Charter Document - 03660083

Universis presentes Literas inspecturis Magistri Walterus Scamel Decanus Sarum et Thomas Beke Archidiaconus Dorshetie salutem in Domino sempiternam Noverit Universitas vestra quod cum inter Venerabilem Patrem Walterum Dei gracia Exoniensem Episcopum ex parte una et Religiosos Viros Fratrem Willelmum Abbatem de Forde et ejusdem Loci Conventum super quibusdam Suspensionis Interdicti et Excommunicacionum Sentenciis utrimque prolatis ac aliis injuriis gravaminibus contumacis et offensis personalibus suborta fuisset materia questionis ex altera Partes eedem ad sui tranquillitatem et pacem super premissis in nos tanquam in arbitros diffinitores ordinatores laudatores seu dictatores voluntate spontanea consenserunt arbitrio nostro diffinicioni ordinacioni laudo seu dicto alte et basse se totaliter submittentes prout in Instrumento super hoc confecto et Parcium sigillis signato plenius continetur Unde nos Magistri Walterus Decanus Sarum et Thomas Archidiaconus Dorshetie super omnibus injuriis gravaminibus contumacis et offensis personalibus inter Venerabilem Patrem Dominum Walterum Dei Gracia Exoniensem Episcopum ex parte una et Religiosos Viros Fratrem Willelmum Abbatem de Forde et ejusdem Loci Conventum subortis ex altera auditis racionibus et allegacionibus Parcium coram nobis propositis et plenius intellectis meritisque propositorum ponderatis In Nomine Domini Amen Ordinamus dicimus et laudamus quod prefatus Abbas pro se et Conventu suo ad honorem Domini Episcopi Exoniensis et Ecclesie sue Exoniensis universas Suspensionis Interdicti et Excommunicacionum Sentencias per ipsum Abbatem de facto in prejudicium Domini Episcopi promulgatas citra Festum Nativitatis Beati Johannis Baptiste jam instans in locis quibus idem Abbas ipsius Sentencias publicavit et fecit per alios publicari publice et sollempniter ac personaliter in Ecclesia Cathedrali Exoniensi in scriptis denunciet et denunciari faciat nullas penitus irritas et inanes quodque ministeriales eorundem Abbatis et Conventus seculares non exempti qui pro suis commissis et offensis auctoritate ejusdem Domini Episcopi sunt Suspensionis et Excommunicacionis Sentenciis innodati a janua Cymiterii Sancti Petri Exoniensis usque ad valvas Ecclesie Cathedralis discooperto capite discincti et discalciati citra Festum predictum cum ipsis per eundem Dominum fuerit nunciatum humiliter veniant et devote ac unicam incontinenti ab eodem Episcopo vel aliquo deputato ab ipso recipiant disciplinam aliam penitenciam quam idem Dominus eisdem duxerit injungendam nihilominus recepturi Idem eciam Abbas pro se et suo Conventu mille marcas sterlingorum prefato Episcopo pro injuriis gravaminibus contumacis et offensis personalibus per ipsos Abbatem et Conventum sedandis eidem promittat et ad moderacionem nostram exsolvat quas quidem mille marcas idem Abbas pro se et Conventu suo dicto Domino Episcopo secundum moderacionem nostram se bona fide soluturum promisit Omnibus autem accionibus seu offensionibus personalibus predicto Abbati et Conventui contra Episcopum memoratum et alios quoscumque occasione premissorum competentibus iidem Abbas et Conventus renuncient omnino Volumus insuper dicimus et laudamus quod Dominus Episcopus memoratus universas Suspensionis Interdicti et Excommunicacionum Sentencias in premissun Abbatem monachos ejusdem et Fratres Conversos ac ministeriales ipsorum exemptos auctoritate Domini ejusdem occasione injuriarum hujusmodi promulgatas ad consciencie scrupulum quodcumque tollendum absque difficultate relaxet et quod Dominus Episcopus mille marcas pretactas usque ad centum marcas Abbati et Conventui predictis remittat Idem vero Dominus Episcopus predictus mille marcas ob Religionis et Domini Regis favorem et ad nostrum rogatum usque ad centum marcas sponte et liberaliter remisit eisdem quas quidem centum marcas idem Abbas vel successores ejusdem pro se et Conventu suo in Festis Sancti Michaelis et Pasche sequentibus in Ecclesia Cathedrali premissa Domino Episcopo vel suo assignato pro equalibus porcionibus integre persolvent Penitenciam autem si quam idem Dominus Episcopus ministerialibus prelibatis ultra disciplinam superius annotatam duxerit injungendam disciplina recepta sine difficultate remittat Decernimus eciam quod omnia et singula premissa sub pena centum librarum a Partibus prefatis inviolabiliter observentur et quod Pars ab isto nostro arbitrio resiliens Parti idem arbitrium observanti dictas centum libras persolvat integraliter sine mora Ad hec reservamus Domino Regi et nobis potestatem cohercendi et compellendi Partem resilientem a Decreto nostro ad solucionem pene antedicte Hec acta fuerunt apud Westmonasterium iij Nonas Maii Anno Gracie MCC septuagesimo septimo