Charter Document - 03660081
| Charter Number: | 03660081 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Excommunication |
| Date: | 1276 |
| Date type: | Internal, A.D., Calendar |
| Resource Link(s): |
|
Charter:
Venerabili Patri et Reverendo Domino Roberto Dei gracia Bathoniensi et Wellensi Episcopo Walterus Ejusdem miseracione Exoniensis Episcopus salutem et sincere in Domino caritatis semper augmentum Illa precipue delinquencium peccata pre ceteris expedit esse nota qui proprie salutis immemores ultro se offerunt ad interitum et sibi faventibus ruine consimilis parant incentivum Sane licet Frater Willelmus de Crukerne Abbas de Forde Cysterciensis Ordinis nostre Dioecesis tam per nos quam per alios Apostolica et ordinaria auctoritate fretos propter offensas manifestas et multiplicatas contumacias Majoris Excommunicacionis vinculo exigente justicia in diversis temporibus dudum innodatus ac eciam auctoritate Canonis in quem incidit simili sentencia ligatus extiterit idem Abbas nihilominus ad dampnationi sue cumulum in malicia sua perseverans malediccionem ut aquam bibere non pavescit et hujusmodi Excommunicacionum Sentencias diucius sustinuit animo indurato Gregem Dominicum infrunita communione per diversa loca transiens inficiendo Cum igitur in hujusmodi rebellione et contemptu mutuum consilium et auxilium viciasim impendere teneamur Paternitatem vestram requirimus et rogamus quatinus ob salutem animarum in subsidium juris assurgentes prefatum Abbatem qui se vestre Dioecesi frequenter inmergit in singulis Ecclesiis vestre Civitatis et Dioecesis singulis Diebus Dominicis et Festivis pulsatis campanis et candelis accensis in terram projectis denunciari facere velitis si placet sic ligatum quousque rubore suffusus ad Ecclesie redierit unitatem et absolucionis beneficium meruerit obtinere ut quem timor Dei a malo non revocat Ecclesiastica saltem coherceat disciplina Datum Londonie viij Kalendas Junii Anno Gracie MCCLXX sexto