Charter Document - 03660080
| Charter Number: | 03660080 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Excommunication |
| Date: | 1276 |
| Date type: | Internal, Episcopal, Feast |
| Resource Link(s): |
|
Charter:
Walterus Dei gracia Exoniensis Episcopus dilecto filio Officiali nostro salutem graciam et benediccionem Eo arctiori providentia delinquencium merito punitur audacia quo eorum appetitus noxius subrepere conatur in vetitum eosque dilapsos in illicitum cum suis fautoribus damnabilius ad Gehenne pertrahit interitum Sane cum frater Willelmus de Crukerne Abbas de Forde Cysterciensis Ordinis nostre Dioecesis tam per nos quam per alios Apostolica et ordinaria auctoritate fretos propter manifestas offensas et multiplicatas contumacias Majoris Excommunicationis vinculo exigente justicia fuerit innodatus ac eciam auctoritate Canonis simili Sentencia ligatus extiterit et denunciatus taliter involutus ipseque in malicia sua perseverans malediccionem bibat ut aquam et hujusmodi Excommunicacionem diucius sustinuerit animo indurato ne Grex Dominicus cure nostre commissus per dicti Abbatis communionem periculosius inficiatur vobis mandamus in virtute obediencie firmiter injungentes quatinus in Cathedrali Ecclesia nostra Exoniensi et in singulis Conventualibus Collegiatis et Parochialibus Ecclesiis nostre Civitatis et Dioecesis per vos et alios quos ad hoc noveritis ydoneos singulis Diebus Dominicis et Festivis pulsatis campanis et candelis accensis in terram projectis prefatum Abbatem sic excommunicatum publice et solempniter denuncietis et denunciari faciatis monentes canonice et moneri facientes universos Christi Fideles nobis subditos ut a dicti Abbatis communione mercando ministrando obsequendo et quolibet alio civili modo inexcusabili adherendo seu favendo se abstineant quousque ad Ecclesie redierit unitatem et absolucionis beneficium meruerit obtinere Si quos vero post vestras moniciones canonicas eidem Abbati communicare examinacione debita inveneritis eos animadversione canonica puniendo castigetis re scripturi nobis Literis vestris Patentibus harum seriem continentibus infra mensem post recepcionem Presencium qualiter Mandatum nostrum fueritis executi Datum apud Horsle in Vigilia Pentecostes Consecracionis nostre anno xix