Charter Document - 03660066
| Charter Number: | 03660066 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Excommunication |
| Date: | 1277 |
| Date type: | Assigned |
| Resource Link(s): |
|
Charter:
Walterus Dei gracia Exoniensis Episcopus dilecto filio Archidiacono Exoniensi salutem graciam et benediccionem Inter ceteras Pastoralis Cure que nobis incumbunt sollicitudines causa Adventus nostri Redemptoris Qui non tantum pro justis set eciam pro omnibus que perierant venerat Officii nostri debitum incessanter excitat et invitat animarum saluti diligenter invigilare ovesque Gregis nobis commissi sanas salubriter confovere et erratice lapsas ad viam Veritatis Salutis antidoto reducere ut sanentur ne quod absit uobis dissimulantibus pereant et nos pro eis ex nostra negligencia Divino judicio puniamur Sane cum quidam parochiani nostri litteraturam maxime Statuta Canonum et Tradiciones Sanctorum Patrum quadam simplicitate ignorantes in Excommunicacionis Sentencias ab hujusmodi Sanctis Patribus a diebus antiquis latas quod dolenter referimus frequenter incidant eisque licere illicita credant indiscrete ut talium Sentenciarum laqueus prudenter evitetur et ignorancia cecitas excludatur vobis mandamus in virtute Obediencie et sub pena Canonica firmiter injungentes quatinus subscriptos Articulos propter quos Excommunicacionis Sentencia incurritur ipso facto in singulis Collegiatis et Parochialibus Ecclesiis vestri Archidiaconatus singulis Diebus Dominicis et Sollempnibus per Sacerdotes parochiales publicare et incidentes in easdem Sentencias Excommunicacionis denunciare faciatis auctoritate nostra singulis hujusmodi Ecclesiarum Rectoribus Vicariis et Sacerdotibus parochialibus injungentes ut singuli eorum Presencium tenorem in suis Ecclesiis sub pena arbitrio Ordinarii taxanda habeant infra mensem in loco eminenti patenter affixum Qualiter mandatum nostrum fueritis executi per Literas vestras Patentes harum Seriem continentes nos infra mensem reddatis cerciores