Charter Document - 03660053

Universis presentes Literas inspecturis Walterus miseracione Divina Exoniensis Episcopus salutem in Domino et perpetuam rei geste memoriam Eterni Regis disponente clemencia inter Apostolorum Successores non ex nostre accionis merito aggregati eorum quantum nobis fuerit inspiratum vestigiis inherere et Ecclesie scissuras quam Sanguine Suo plantaverunt ejusque jura diucius collapsa pro viribus reparare monemur et inducimur officii nostri debitum considerantes ut Divino Cultu ampliato diebus nostris merito numeroque populus Deo serviens augeatur Sane Cridetonensis Ecclesia olim in suo ordine celeberrima et pontificali dignitate insignita ac preclaris diversorum Sanctorum reliquiis et miraculis a diebus antiquis adornata Indulgenciarum quoque Romanorum Pontificum necnon et aliorum Sanctorum Patrum magnifice dotata beneficiis succedentibus temporum curriculis in dotibus lapsa Cultuque Divino diminuta ac pristina dignitate spoliata gemitum columbe pro cantu emittens exulatum ejus decorem planctu lacrimoso deplorat subuencionis remedium prestolando Nos igitur ejus planctui et suspiriis pio compacientes affectu rugas ipsius salutaris unguenti recreacione linire cupientes extenuata ejus viscera debito filiorum numero misericorditer impregnanda sex Canonicas et Prebendas duodecim antiquis olim ibidem existentibus dudum adjungendo statuimus et statuendo adjunximus secundum numerum et statum dierum antiquorum et Ecclesiam de Eglosheyl cujus Advocacio ad mensam Episcopalem noscitur pertinere eidem Ecclesie Criditonensi canonice appropiavimus ordinantes ut singuli sex Canonicorum quos de novo creavimus singulas sex marcas annuas et singuli eorundem Vicariorum singulos viginti solidos cum aliis duodecim Vicariis conferendos nomine Prebende et Vicarie percipiant annuatim Verum quia prefate Ecclesie de Eglosheyl redditus et proventus ad onera dictarum sex Prebendarum non sufficiunt eandem Ecclesiam ad antiquum statum reducentes ut auctus Canonicorum numerus de sufficientibus et certis proventibus suam percipiant Porcionem loco ipsius Ecclesie de Eglosheyl Ecclesiam de Lannante cujus Advocacionem cum ejus appendiciis videlicet annua pensione triginta solidorum ex dono et concessione dilectorum filiorum Prioris et Conventus de Triordrayt canonice adquisivimus que ad nostram spectat collacionem cum omnibus ad eam spectantibus immunem et quietam a prestacione pensionis antedicte Ecclesie Criditonensi et ejusdem Loci Canonicis dilectorum filiorum Decani et Capituli nostri Exoniensis ad hoc accedente consensu legitimo pro salute anime nostre et animarum antecessorum nostrorum attestacione presentis Scripture appropriacione perpetua adjungimus et adjunctione canonica adnectendo irrevocabiliter appropriamus in proprios usus pleno jure perpetuo possidendam salva competenti Vicaris in toto altilagio decimis piscium agnorum et lane dumtaxat exceptis ex nostra Ordinacione consistente per nos et successores nostros ydoneis Personis omnia onera ordinaria debita et consueta perpetuo agnoscentibus canonice conferenda Porro unam acram Anglicanam terre in Villa de Penbegel que vulgari ydiomate [] dicitur et quam ex dono et concessione dictorum Prioris et Conventua ut prediximus una cum prefata Advocacione dudum fuimus assecuti et ipsum jus patronatus in signum tituli nostri proteccionis warantie seu defensionis nostre nobis et successoribus reservamus Adiciendo quoque statuimus et statuendo ordinamus ut predictorum sex Canonicorum Prebende et eorundem Vicariorum Porciones per manus Precentoris Cridiatonensis qui pro tempore fuerit dummodo personaliter resideat alioquin per manus alicujus Canonici residentis a Communitate Fratrum de nostra et successorum nostrorum connivencia ad hoc deputati ad quatuor anni terminos principales prefatis Canonicis et Vicariis annuatim distribuantur residuum vero proventuum dicte Ecclesie de Lanante in cotidianas distribuciones Canonicorum residencium futuris temporibus assignamus perpetuo convertendum Si qua Ecclesiastica secularisve persona hanc nostre appropriacionis seu concessionis paginam infringere seu prefate Criditonensis Ecclesie jura perturbare aut minuere ausu temerario presumpserit si secundo terciove monita non resipuerit malediccionem Dei Omnipotentis Gloriose Virginis Marie Omniumque Sanctorum et nostram se noverit incursuram et a Sanctissimo Corpore et Sanguine Domini fiat aliena cunctis autem eidem Loco sua jura servantibus sit Pax Domini nostri Jesu Christi quatinus hic fructum bone accionis percipiant et apud districtum Judicem premia Eterne Pacis inveniant Ad hujus rei memoriam sempiternam et fidele testimonium presenti Scripto sigillum nostrum duximus apponendum Datum mense Octobris Anno Gracie MCC septuagesimo secundo et Consecracionis nostre quinto decimo apud Horsleghe