Charter Document - 03660049

Noverint universi presentes Literas visuri vel audituri quod cum inter Venerabilem Patrem Dominum Walterum Exoniensem Episcopum ex parte una et nobilem virum Dominum Edmundum Comitem Cornubie ex altera super quibusdam contencionibus et transgressionibus dicto Episcopo et Ecclesie Exoniensi illatis suborta fuisset materia questionis ac dicte Partes in alto et basso arbitrio ordinacioni decreto seu laudo super dictis contencionibus et transgressionibus Venerabilis Patris Domini Cantuariensis Archiepiscopi se sub misissent tandem placuit Partibus memoratis et inter easdem convenit amicis communibus intervenientibus post tractatus varios dictam contencionem per viam composicionis pro bono pacis amicabiliter sopiri in forma subscripta videlicet quod dictus Comes vult et concedit quod Ecclesia et ministri Ecclesie pacem habeant in Cornubia et aliis terris et dominiis ipsius Comitis Exoniensis Civitatis et Dioecesis sicut habuerunt tempore Domini Regis Allemannie patris sui et suo usque ad tempus contencionis inter dictui Dominum Episcopum et ipsum mote Vult eciam et concedit dictus Comes quod pro Maneriis de Poltone et de Penren fiat secta ad duos comitatus et duos turnos Vicecomitis in anno per quatuor liberos et legales homines tantum de utroque Manerio sicut fieri consuevit tempore Regis Allemannie predicti et dicti Comitis usque ad tempus dicte contencionis mote et quod pro Maneriis de Treigaer et Lawyttone fiat secta per unum liberum et legalem hominem tantum de utroque Manerio ad duos comitatus et duos turnos Vicecomitis in anno sicut fieri consuevit tempore dicti Regis Allemannie et ipsius Comitis usque ad tempus dicte contencionis mote Item vult et concedit dictus Comes quod dictus Dominus Episcopus habeat foris facturam assise panis et cervisie in Maneriis suis de Poltone Penren Tregaer Lawittone et Sancti Germani sicut habere consuevit tempore dicti Regis Allemannie et ipsius Comitis usque ad tempus dicte contencionis mote Et quod pillorium et tumberellum liberi burgi de Penren prostratum erigatur et libertas dicti burgi integre restituatur Item quod parcus de Gargaul reficiatur infra certum competens tempus Et quod libertates Manerii de Gargaul plene observentur sicut in Carta Regis Allemannie supradicti super hoc confecta plenius continetur Et quod eciam omnes alie libertates in predictis Maneriis Episcopi et aliis lese vel violate restituantur et in eum statum reducantur sicut fuerunt tempore Regis Allemannie et ipsius Comitis usque ad tempus dicte contencionis mote Item quia diversa dampna et injurie dicto Domino Episcopo Exoniensi et ejus Ecclesie per diversos malefactores preter conscienciam Comitis ut creditur que idem Comes plane de advocat multipliciter sunt illata promittit Comes bona fide quod contra dictum Dominum Episcopum ad dampna sua recuperanda nullum tenebitur set ipsum in juris sui prosecucione juvabit Item quod terre et tenementa redditus et servicia que per ministeriales dicti Comitis ad opus ejus in lesionem et dampnum dicti Episcopi et Ecclesie sue Exoniensis injuste sunt usurpata a tempore orte turbacionis predicte restituantur et in statum in quo prius fuerunt reducantur Item concedit dictus Comes quod si Dominus Ricardus de Seyhtone Johannes Goshelm et alii qui non sunt de Dioecesi Exoniensi aliquid extorserint vel injuste ceperint de hominibus Episcopi clericis suis et bonis dicti Episcopi quod ad predictum Comitem pervenerit idem Comes illud bona fide restituet Et si idem Comes hujusmodi extorta non receperit juvabit Dominum Episcopum bona fide quod sibi super hoc a dictis malefactoribus plenaria satis fiet Ita vult et concedit Dominus Comes quod dictus Dominus Episcopus habeat plenam restitucionem seysinam et possessionem de omnibus libertatibus et aliis supradictis quibus idem Episcopus et sui predecessores usi fuerunt et eisdem bene et in pace gaudeat sicut predictum est salvo eidem Comiti jure suo si inde loqui voluerit ita quod predicta inviolabiliter absque impedimento dicto Episcopo remaneant donec predictum Comitem jus suum in premissis si quod habuerit per legale judicium disracionare contigerit Premissam autem Composicionem Venerabilis Pater Dominus Archiepiscopus Cantuariensis predictus pro bono pacis inter Partes memoratas initam de consilio et consensu Fratrum et Coepiscoporum suorum sibi assidencium videlicet Dominorum Johannis Londoniensis Walteri Roffensis Aniani Assavensis Episcoporum et Domini Roberti Electi Bathoniensis et Wellensis approbavit laudavit ratificat et confirmavit Et in hujus rei geste testimonium et perpetuitatis fiduciam pleniorem predicte Partes huic Scripto ad modum cyrographi confecto sigilla sua una cum sigillo Venerabilis Patris predicti Domini Cantuariensis Archiepiscopi et aliorum prenominatorum Episcoporum et Electi predicti vicissim apposuerunt et eam Composicionem bona fide in omnibus et singulis in presencia predictorum Prelatorum observare fideliter promiserunt Actum et datum in Capella de Lamehethe die Jovis proxima post Festum Sancti Gregorii Pape Anno Gracie MCCLXX quarto