Charter Document - 03660047
| Charter Number: | 03660047 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1274 |
| Date type: | Assigned |
| Resource Link(s): |
|
Charter:
Walterus miseracione Divina Exoniensis Episcopus dilectis filiis Archidiacono Cornubie vel ejus Officiali Magistro Johanni de Wythiel et Decano de Poudresyre salutem graciam et benediccionem Fama communi que notorium inducere videtur deferente dolenter referentes nuper accepimus quod Ricardus de Seytone Miles Senescallus Nobilis viri Domini Comitis Cornubie dilectos filios nostros Rogerum Rectorem Ecclesie de Nasfonteyn Rogerum perpetuum Vicarium Ecclesie Sancti Petroci Bodminie et Andream Gydion presbiteros conficto contra eos mendaciter transgressionis pallio injuste capi et diro carceri mancipari facere non expavit in anime sue periculum Ecclesiastice libertatis prejudicium et scandalum plurimorum Quocirca vobis mandamus in virtute obediencie firmiter injungentes quatinus receptis Presentibus associatis vobis aliquibus personis Ecclesiasticis prefatum Senescallum moneatis et efficaciter inducatis ut prefatos Clericos taliter incarceratos infra triduum post monicionem vestram liberet et liberatos in pace dimittat Alioquin citetis eum peremptorie quod proximo die juridico post Festum Sancti Michaelis in Majori Ecclesia Exoniensi compareat coram nobis vel vices nostras gerente super dictorum Clericorum capcione et detencione responsurus facturus et recepturus quod justicia suadebit Idem quoque Senescallus sicut ex frequenti clamore subditorum nostrorum auribus nostris insonuit jura et libertates Ecclesiasticas ausu temerario in status Ecclesie et Cleri subversionem impugnare mutilare diminuere infringere et evertere non formidat Clericos videlicet et Ecclesiasticas personas contra sacrorum Canonum statuta in personalibus accionibus in foro seculari coram se in judicium trahit invitos mulctas et penas pecuniarias in immensum per exquisitas districciones et excogitatas malicias ab eisdem extorquet de testamentis et de bonis defunctorum matrimoniis decimis et jure decimarum Sacramentorum et Sacramentalium percepcione de facto ordinat et de eisdem et aliis que ad forum Ecclesiasticum non est dubium pertinere pro sue libito voluntatis disponit Clericos eciam alios et Ecclesiasticas personas injuriose capit incarcerat et a quibusdam eorum gravem extorquet redempcionem Sacrilegia quoque et alia enormia que conniventibus oculis incorrecta pertransire nolumus sicuti nec debemus committit contra Deum et Canonicas sancciones Quare vobis mandamus in virtute obediencie predicte firmiter injungentes quatinus memoratum Senescallum citatis peremptorie quod dictis die et loco coram nobis vel vices nostras gerente compareat super hiis et aliis sibi obiciendis responsu rus facturus et recepturus quod juris fuerit et racionis Quodsi non omnes hiis exequendis interesse poteritis duo vestrum vel unus ea nihilominus exequatur Et quid inde feceritis nos Literis vestris Patentibus harum seriem continentibus certificetis diem recepcionis Presencium ac modum monicionis et citacionis eisdem inserentes Datum apud Clyst die Lune proxima post Festum Nativitatis Beate Marie Virginis