Charter Document - 03660045
| Charter Number: | 03660045 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1264 |
| Date type: | Internal, A.D., Episcopal, Feast |
| Resource Link(s): |
|
Charter:
Walterus miseracione Divina Exoniensis Episcopus dilecto filio Magistro Roberto Everarde Officiali nostro salutem graciam et benediccionem Cum multa fieri prohibeantur que alias utilitatis causa et necessitatis urgentis articulo permittantur non debet vester animus commoveri si aliqua forsan statuantur que aliquorum judicio duriciam sapiant vel gravamen Hinc est quod cum Regnum et Sacerdocium jam diversimode diversis rerum eventibus lesum extiterit et turbatum ac gravioris lesionis et vehemencioris turbacionis timor et rumor videlicet de hostili alienigenarum adventu in Regni subversionem et confusionem publicam indigenarum corda tam invaserit ut audistis ponderatis periculis que Regnum et incolas universos nisi a Domino defensore propicio tueatur circumveniunt et attentis prejudiciale vel molestum reputari non debet si aliqua ad relevacionem status Ecclesie Anglicane que in se et suis libertatibus multipliciter et plus solito est depressa et ad defensionem Patrie ad quod unum quemque naturale fedus obligat et invitat a viris Ecclesiasticis de bonis spiritualibus conferantur Cum igitur sicuti supradiximus ut Ecclesia relevetur et ut contra alienigenarum hostiles incursus qui cujuscumque condicione rejecta loco non parcerent nec persone cum fortitudinis gravitate resisti valeat et virtute et de consilio Episcoporum Regnique Prelatorum et Cleri nuper apud Londoniam congregatorum ordinatum extitit et provisum ut omnes viri Ecclesiastici Religiosi et alii de bonis suis Ecclesiasticis decimam partem secundum taxacionem communem contribuere debeant excusacione in contrarium omnino rejecta devocionem eorum in utilitatem communem et profectum proprium Presentibus excitantes propensius consulendo mandamus quatinus omnium proventuum Ecclesiasticorum decimam partem aliquibus certis personis per nos auctoritate nostra ad predicta exequenda maturius deputandis omni rejecto subterfugii obstaculo assignetis Insuper quoniam tempus pro homine interpellat et de hostium adventu in proximo comminatur oportetque sibi cum maturitate debita resistatur expedit sicuti provisum est quod predicte decime medietas citra Festum Decollacionis Sancti Johannis Baptiste persolvatur Datum apud Tanrigge in crastino Sancti Laurencii Anno Domini MCCLX quarto et Consecracionis nostre septimo