Charter Document - 03660022

Cum publicum sit et notorium Johannem de Aleth Militem Isabellam de Albo Monasterio durante matrimonio inter Reginaldum de Albo Monasterio quondam maritum suum et ipsam per adulterium polluisse eodemque Reginaldo vita functo ipsos Johannem et Isabellam in predicta carnis dissolucione juxta prioris vite exercicium in tocius Ecclesie scandalum et animarum suarum periculum cohabitasse essetque suspicio ob hoc suborta non modica quod in casum incidissent quo adulter cum adultera a prioris viri lege soluta matrimonialiter conjungi non posset et quod iidem Johannes et Isabella in gradu consanguinitatis a jure prohibito se invicem contingerent ac propter hoc dudum ipsis extiterit non immerito ex parte nostra publice prohibitum et interdictum ne aliquatenus insimul cohabitarent seu matrimonialiter se facerent conjungi quoquo modo donec rei Veritas super hoc plenius esset inquisita qui nostro vilipenso interdicto ad partes remociores maliciose se transferences clandestine procurarent de facto cum de jure non possent se invicem desponsari Quo quidem taliter perpetrato et ad aures nostras ex clamosa insinuacione sepius perlato non potuimus sicut nec debuimus sine gravi Ecclesie scandalo et animarum suarum periculo tantum facinus oculis conniventibus sub dissimulacione pertransire Unde vobis dedimus in mandatis ut vos in forma debita super hiis cognosceretis et inquiretis diligenter et vos postmodum de premissis juxta jurisdiccionem cognoscentes rei geste veritate super eisdem comperta pleniore post canonicas moniciones et interdicciones eisdem a vobis ex ordine sepius canonice factas propter eorundem rebellionem et contumacias multiplicatas et manifestas in ipsos tam interdicti quam excommunicacionis majoris sentencias vicissim in scriptis legitime promulgastis In qua quidem excommunicacionis sentencia animo indurato jam diucius pertinaciter sunt morati claves Ecclesie viliter contempnendo Quare vobis mandamus firmiter injungentes ne Rex Dominicus ex eorum illicita communione infici valeat vel contaminari quatinus dictam excommunicacionis sentenciam in forma superius plenius annotata per totum Episcopatum nostrum et in Archidiaconorum Capitulis ac singulis Ecclesiis Conventualibus et Parochialibus singulis Diebus Dominicis et Festivis pulsatis campanis candelis accensis et in terram projectis in ipsos facias innovari et ipsos excommunicatos publice nunciari donec ad Ecclesie redierint unitatem et absolucionis beneficium in forma debita meruerint obtinere Datum apud Farndone viij Kalendas Decembris Anno Gracie MCCLXX septimo