Charter Document - 03610599

Willelmus [] dilectis filiis Abbati et Conv[entui] de Whiteby s[alutem] gr[atiam] et benedictionem Inter sollicitudines incumbentes nobis officii pastoralis illud precipuum esse credimus ut gregis Dominici nobis crediti errantes oves in[] ad vite viam priusquam in profundum malorum proveniant studeamus toto mentis conamine revocare Cum itaque fratrem Thomam de Schirburn monachum in Mon[aster]io de Seleby professum dudum in eodem Mon[aster]io visitationis officium exercentes comperissemus in aliquibus excessisse contra sui ordinis disciplinam sibique paterno compatientes affectu in suo Mon[aster]io ad expiationem commissorum et cautelam insuper futurorum injunxissemus eidem cum moderamine debito penitentiam salutarem ipse quadam animi levitate nimiam habens fiduciam in consanguineis et propinquis quasi ponens carnale brachium suum abjecto jugo obedientie et ruptis vinculis observantie regularis a suo Mon[aster]io clam recessit jamque fuit in seculo per aliqua tempora minus providens in sue religionis scandalum conversatus Cum igitur idem frater Thomas divina ut speramus gratia inspiratus labentis seculi vanitatem conspiciens et ad nos in spiritu humilitatis rediens ad instar filii prodigi ad patrem reversi profundis suspiriis et lacrimosis singultibus ad nos non cessaverit clamitare ut ipsum tanquam unum de religionis sue mercenariis faciamus Nos volentes juxta Evangelicam veritatem accensa lucerna misericordie dragmam predictam invenire ovemque errantem nostris humeris reportare predictum fratrem Thomam pro eo quod inter vos vigere novimus devotionis fervorem et religionis honestatem ad vos duximus destinandum devotionem vestram requirentes et hortantes in visceribus caritatis quatinus ipsum benigne admittatis et fraterna caritate tractetis ut saltem per dimidium annum in tam honesto et religioso collegio conversatus ad tollendum super se jugum d[omi]ni salubriter valeat erudiri nosque postmodum annuente d[omi]no possimus de ipsius statu aliter ordinare Penitentiam vero quam dum inter vos moram fecerit sibi duximus injungendam ei dimisimus in quadam schedula in dentata cujus alteram vobis mittimus presentibus inclusam ut Prior vel is qui Conventui pro tempore presidebit sedulo inde videat et attendat quod dictus frater Thomas injunctam sibi penitentiam peragat humiliter ac devote Valete Datum apud Parcum Helagh iii Idus Septembris Pontif[icati] nostri a[nno] iiii Penitentiam fratris Thome de Schirburn monachi dum in Monast[er]io de Whiteby moram fecerit taliter duximus ordinandam In primis siquidem eidem injunximus quod sequatur Conventum tam in choro quam in claustro refectorio et dormitorio sitque in omni gradu ultimus in Conventu Item a celebratione divinorum et a quolibet altaris ministerio totaliter sit suspensus singulis ebdomadis Presidenti vel ei quem ad hoc Presidens deputaverit bis saltem peccata sua confiteatur eisdemque vicibus humiliter ab eodem recipiat disciplinam Item quolibet die septem psalmos penitentiales cum reverentia coram aliquo altari in ecclesia prostratus dicat humiliter et devote Item qualibet septimana duo psalteria dicat Omni quarta feria jejunet a lacti ciniis et hiis que sementinam carnis trahunt originem penitus abstinendo Omni etiam die Veneris jejunando pane cerevisia et leguminibus tantummodo sit contentus Silentium observet jugiter juxta regulam sui ordinis locis et temporibus oportunis Litteras vel nuntium per se vel per alium non emittat nec emissum recipiat a quocunque Nulli seculari loquatur nisi coram Presidente et quecunque loquitur audiente Septa Monasterii non exeat quovis modo Hec omnia et singula dicto fratri Thome in virtute sancte obedientie injungimus observanda donec a nobis relaxationem sive mitigationem aliquam super hiis meruerit obtinere Vos Abbas nobis oportuno tempore rescribatis qualiter idem frater Thomas se gesserit et si penitentiam peregerit aut agere in aliquo contempserit memoratam