Charter Document - 03600453
| Charter Number: | 03600453 |
|---|---|
| Cartulary Title: | Registrum Malmesburiense [Malmesbury] |
| Charter Language: | Latin |
| Charter Origin: | Religious |
| Charter Type(s): | Assignment |
| Date: | 1289 |
| Date type: | Internal, A.D., Feast |
| Resource Link(s): |
|
Charter:
Omnibus sancte matris ecclesie filiis et precipue abbatibus et fratribus in Malmesburiensi cenobio nobis per gratiam Dei successuris frater Willelmus licet indignus Malmesburiensis ecclesie minister humilis salutem in Domino sempiternam Quoniam facta mortalium per temporum variationem et prelatorum mutationem oblivioni de facili traduntur nisi scripture beneficio muniantur ad universitatis vestre notitiam volumus pervenire quod cum conventus noster unam marcam de Fouleswyke ad anniversarium magistri Nicholai quondam rectoris ecclesie de Cristemaneford singulis annis celebrandum et quatuor solidos de molendino de Avene ad pitanciam suam percipere consuevissent nolentes quod beneficia fratribus nostris tempore nostri regiminis assignata per nos subtrahantur sed potius per nos conserventur et augmententur nos ad majorem securitatem conventui nostro super solutione dicte marce et quatuor solidorum faciendam predictam marcam una cum quatuor solidis antedictis de illis duobus tenementis que quondam fuerunt Willelmi le Porter quorum unum situm est ex opposito ecclesie Sancti Pauli et solvit xii solidos et aliud ex opposito capelle Omnium Sanctorum in villa de Malmesburia quod solvit x solidos sicut carte inde confecte plenius testantur ad pitanciam conventus nostri pro anniversario predicti magistri Nicholai celebrando singulis annis assignavimus percipiendam Et predicta duo tenementa cum omnibus pertinentiis suis et eschetis que ratione eorundem aliquo tempore aliquo modo possint contingere predictis fratribus nostris ad pitanciam suam inperpetuum assignavimus Nos vero de predictis denariis quatuor solidis et octo denariis hostiario qui pro tempore fuerit pro necessariis hospitibus inveniendis per manus pitanciarii ad festum Sancti Michaelis assignavimus percipiendos Ne autem hec provisio et assignatio nostra per maliciam temporis vel per mutationem prelatorum aliquo tempore possit irritari eandem uniformi assensu et voluntate conventus nostri sigillo humilitatis nostre una cum sigillo capituli nostri duximus roborandum Datum in capitulo Malmesburie in festo Sancti Kenhelmi regis et martiris anno Domini MCC octogesimo nono
Source (click image below to view full size)
