Charter Document - 03600413

Omnibus sancte matris ecclesie filiis et precipue abbatibus et fratribus in Malmesburiensi cenobio nobis successuris frater Willelmus licet indignus Malmesburiensis ecclesie minister humilis salutem in Domino sempiternam Quoniam facta mortalium per temporum variationem et prelatorum mutationem oblivioni de facili traduntur nisi scripture beneficio muniantur ad universitatis vestre notitiam volumus pervenire quod concessimus et assignavimus custodi altaris Beate Marie in ecclesia Sancti Aldhelmi de Malmesburia quindecim solidos et quatuor denarios annuatim percipiendos videlicet de dimidia virgata terre quam habuimus de dono Ricardi filii Avicie in Parva Schorstone et de terra quam habuimus de dono Roberti Pinkeneye in eadem villa unam marcam Ita quod quicumque tenuerint terram predictam teneant illam de predicto custode qui pro tempore fuerit cum omnibus pertinentiis suis et cum omnibus eschetis que predicto custodi aliquo tempore accidere possint ratione predicte terre Et de domo quam Walterus Torfyn levare fecit ex opposito elemosinarie duos solidos ad quatuor anni terminos Concessimus etiam et per presens scriptum confirmamus predicto custodi qui pro tempore fuerit duas libras cere annuatim pro decimis de Somerford Mauduth percipiendas Et pro predictis quindecim solidis et quatuor denariis de predictis terris et domo predicta annuatim percipiendis et predictis duabus libris cere sustinebit custos altaris predicti quicumque pro tempore fuerit singulis annis viginti cereos secundum quod forum cere se habebit quorum duo cerei erunt pro anima Walteri Galun et ceteri cerei pro animabus abbatum qui coram dicto altari requiescunt Et ardebunt predicti viginti cerei si forum cere ita se habeat quolibet die ad missam Beate Marie Et quotiens necesse fuerit renovabuntur cerei predicti Et in anniversario abbatum Johannis Galfridi et nostri citius quo dirige incipiatur illuminentur predicti viginti cerei et ardeant quousque illud officium fuerit consummatum et in crastino citius quo missa incepta fuerit illuminentur predicti viginti cerei Missa autem celebrata statim extinguantur et in anniversario predicti Walteri Galun similiter Cum etiam coquinarius domus nostre percipere consuevisset ad duos terminos de preposito de Creddewelle decem solidos pro terra de Houlrugge et pro terra que fuit Willelmi Paynel in Puritone quinque solidos et pitanciarius pro terra quam Johannes le Boy tenuit in Brokyneberge de feodo quondam Clementis Sporun quinque solidos ad quatuor anni terminos et nos predictum redditum predictorum coquinarii et pitanciarii redditui nostro annuo in maneriis predictis assignaverimus nos ne redditus predictorum coquinarii et pitanciarii per nos diminuatur concessimus quod predictus coquinarius percipiat singulis annis de preposito de Kemele decem solidos ad duos anni terminos de terra que fuit Ricardi le Clerk in Kemele et de eodem preposito et de eadem terra dicti Ricardi le Clerk quinque solidos ad quatuor anni terminos Et pitanciarius de eodem preposito quinque solidos de terra predicta ad quatuor anni terminos Ne autem hec provisio et assignatio nostra per malitiam temporis vel per mutationem prelatorum aliquo tempore possit irritari eandem sigillo humilitatis nostre unacum sigillo capituli nostri duximus roborandum Datum in capitulo nostro Malmesburie die Jovis proxima ante festum Translationis Sancti Edwardi regis anno Domini MCC octogesimo quarto