Charter Document - 03600361

Noverint universi quod cum controversia mota esset inter dominum Willelmum abbatem et conventum Malmesburie ex parte una et dominum Johannem Maudut ex altera super quadam communa quam idem dominus Johannes exigebat in terris et pratis predictorum abbatis et conventus et hominum suorum de Rodburne cum omnibus averiis suis et hominum suorum de Somerford qui servilis sunt conditionis et super communa quam iidem abbas et conventus exigebant in terris et pratis predicti domini Johannis ex utraque parte aque que Avene appellatur pax in hunc modum conquievit Videlicet quod predicti abbas et conventus remiserunt et quietum clamaverunt pro se et successoribus suis et etiam pro hominibus eorum de Rodbourne inperpetuum totam communam quam habuerunt vel habere potuerunt in terris et pratis predicti Johannis in australi parte aque predicte et etiam totam communam in prato eorum Kyngmed appellato in boriali parte aque predicte post fenum inde cariatum Et predictus Johannes remisit et quietum clamavit pro se et heredibus et assignatis suis et etiam pro omnibus hominibus suis de Somerford qui servilis sunt conditionis inperpetuum totam communam quam habuit vel aliquo modo habere potuit in terris et pratis predictorum abbatis et conventus et etiam hominum suorum de Rodbourne in australi parte aque predicte Et ut ista compositio firmiter observetur predicti abbas et conventus et predictus dominus Johannes Maudut hoc scriptum inter eos fieri fecerunt bipertitum et sigillis eorum alternatim appensis munierunt Hiis testibus dominis Ricardo de Coleshulle Ricardo Cotele G de Wrokeshale Thoma de la Mare Henrico de Cerne militibus Adam de Illeghe Rogero de Evesham Thoma Tyeys Waltero Maudut Willelmo de Lusteshulle Henrico le Scay et multis aliis Datum apud Malmesburiam die decollationis Beati Johannis Baptiste anno Domini MCC octogesimo primo