Charter Document - 03600353

Omnibus sancte matris ecclesie filiis et precipue abbatibus et fratribus in Malmesburiensi cenobio nobis successuris frater Willelmus licet indignus Malmesburiensis ecclesie minister humilis salutem in Domino sempiternam Quoniam facta mortalium per temporum variationem et prelatorum mutationem oblivioni de facili traduntur nisi scripture beneficio muniantur ad universitatis vestre noticiam volumus pervenire quod cum conventus noster quatuor marcas de rectore ecclesie de Puretone precentor duas marcas de rectore ecclesie de Mynty coquinarius unam marcam de rectore ecclesie de Kemele nomine pensionis singulis annis percipere consuevissent ne beneficia fratribus nostris assignata tempore regiminis nostri subtrahantur sed potius per nos conserventur et augmententur illos centum solidos quos singulis annis ad scaccarium nostrum de vicario de Kemele percipere consuevimus predictis fratribus nostris inperpetuum assignavimus videlicet ad pitanciam conventus quatuor marcas precentori quicumque pro tempore fuerit duas marcas coquinario unam marcam Et ad anniversarium patris et matris mee singulis annis pariter in conventu faciendum dimidiam marcam Ad hec beneficia que de nostro adquisito dictis fratribus assignavimus a quibus personis et tenementis debeantur et in quos usus assignentur presentibus fecimus annotari videlicet de terra quondam Clementis Sporun quadraginta solidos de domo que fuit quondam Johannis de Husseburne contra la Gyaude sex decem solidos de terra que fuit Willelmi le Vrie de Corstone decem solidos de domo que fuit Thome le Rer in Westeport juxta domum Walteri de la Gutere sex solidos de tenemento quondam Willelmi Janitoris in Magna Strata ville Malmesburie quod Johannes Aurifaber tenet quatuordecim solidos De quibus reditibus quicunque perceperit redditus predictos solvet capellano quicunque celebraverit in Carnario pro anima Walteri Galun viginti et duos solidos in anniversario nostro ad distributionem pauperum unam marcam quod quidem anniversarium pro anima nostra fiet in conventu sicut pro abbate Galfrido ad distributionem pauperum die Animarum dimidiam marcam et sacriste ecclesie nostre Malmesburie de dicto tenemento quondam Willelmi Janitoris ad festum Sancti Aldelmi duodecim denarios Dictis autem solutionibus et liberationibus de predictis reditibus factis sicut predictum est remanebunt ad pitanciam conventus singulis annis quadraginta et tres solidi Ne autem hec provisio et assignatio nostra per maliciam temporis vel per mutationem prelatorum aliquo tempore possit irritari eandem sigillo humilitatis nostre una cum sigillo capituli nostri duximus roborandum Datum in capitulo Malmesburie die Dominica proxima ante festum Sancti Nicholai anno Domini MCCLXX septimo Item assignavimus ad anniversarium patris et matris mee faciendum illud tenementum quod fuit aliquando Willelmum Wynci in Westeport et quod tenementum Nicholaus filius Willelmi Janitoris et Editha uxor ejus nobis dederunt situm juxta tenementum quondam Willelmi de Hundlavintone Et est anniversarium patris nostri die Beate Margarete virginis matris vero nostre idus Octobris