Charter Document - 03600344
| Charter Number: | 03600344 |
|---|---|
| Cartulary Title: | Registrum Malmesburiense [Malmesbury] |
| Charter Language: | Latin |
| Charter Origin: | Religious |
| Charter Type(s): | Maintenance |
| Date: | 1281 |
| Date type: | Internal, A.D., Feast |
| Resource Link(s): |
|
Charter:
Omnibus sanctae matris ecclesiae filiis et praecipue abbatibus et fratribus in Malmesburiensi cenobio nobis successuris frater Willelmus licet indignus Malmesburiensis ecclesiae minister humilis salutem in Domino sempiternam Quoniam facta mortalium per temporum variationem et praelatorum mutationem oblivioni de facili traduntur nisi scripturae beneficio muniantur ad universitatis vestrae notitiam volumus pervenire quod cum pitancia nostri conventus ad recreationem ipsius conventus modo quo deceret se non posset extendere nos ad augmentationem ipsius pitanciae terram de Fouleswyke cum omnibus pertinentiis suis quam habuimus ex dono magistri Nicholai de Malmesburia pitanciae praedicti conventus imperpetuum concessimus assignandam Ita quod pitanciarius quicunque fuerit reddat annuatim capellano celebranti in Carnario pro anima praedicti magistri Nicholai quatuor marcas ad quatuor anni terminos et ad anniversarium praedicti magistri Nicholai faciendum unam marcam et coquinario quinque marcas ad quatuor terminos consuetos et usitatos videlicet ad quemlibet terminum sexdecim solidos et octo denarios ad inveniendum capellano hospitalis Sanctae Mariae Magdalenae potagium et unum generale et fratri Willelmo de Buruthone et heredibus suis potagium et duo fercula de coquina dicti conventus singulis diebus percipienda Et cum celerarius et alii fratres nostri in absentia nostra domi ad mensam nostram comedentes de coquina conventus sicut caeteri fratres nostri in refectorio comedentes percipere consuevissent volumus quod nec celerarius nec aliquis alius monachus domus nostrae in absentia nostra ad mensam nostram comedens de caetero aliquid de praedicta coquina percipiat Ne autem haec provisio et assignatio nostra per temporis maliciam vel praelatorum mutationem aliquo tempore possit irritari eandem sigillo humilitatis nostrae una cum sigillo nostro communi duximus roborandam Datum in capitulo nostro Malmesburiae die Nativitatis Beati Johannis Baptistae anno Domini M ducentesimo octogesimo primo
Source (click image below to view full size)
