Charter Document - 03600332

Hec est finalis concordia facta ad festum Sancti Petri quod dicitur ad Cathedra anno regni regis Henrici filii regis Johannis quadragesimo primo inter dominum Godfridus abbatem et conventum Malmesburie ex parte una et dominum Philippum de Cerne militem ex altera videlicet quod predictus Philippus concessit pro se et heredibus suis predictis abbati et conventui et eorum successoribus quod homines sui de Suttone singulis annis in crastino Sancti Bartholomei liberum ingressum et egressum habeant in omnibus pratis suis juxta Avene in australi parte pontis de Cristemaleforde ad averia sua pascenda exceptis porcis dummodo predicta prata fuerint falcata et fena adunata usque ad festum Purificationis Beate Marie sine aliqua contradictione aut vexatione predicti Philippi vel heredum suorum inperpetuum Ita tamen quod si averia de Suttone dampna faciant in fenis predicti Philippi vel heredum suorum per visum proborum hominum dicto Philippo et heredibus suis dampna emendentur Et pro hac concessione predicti abbas et conventus concesserunt pro se et successoribus suis prefato Philippo et heredibus suis quod omnes homines sui de Suttone singulis annis inperpetuum faciant unam acram in campis suis de Dreycote propriis et laboribus et sumptibus videlicet quelibet caruca de Suttone dimidiam acram in quocumque tempore anni voluerint dummodo per tres dies fuerint premuniti Preterea prefati abbas et conventus concesserunt predicto Philippo et heredibus suis sufficientem chaciam cum averiis suis ad prata sua pascenda et abilem viam ad fena sua carianda cum carectis et carris ultra campum suum de Suttone per quandam semitam que se extendit usque ad molendinum de Avene que jacet juxta Wateresdich Ita quod cum campus in parte australi predicte semite fuerit inbladatus predictus Philippus et heredes sui habeant chaciam et cheminum in parte boreali et cum campus in parte boreali fuerit inbladatus predictus Philippus et heredes sui habeant chaciam et cheminum in parte australi predicte semite Et si contingat utrumque campum esse inbladatum tunc debent habere chaciam et cheminum per mediam villam de Suttone et sic per regiam viam que extendit versus Chippeam usque ad predictam semitam et sic ad pratum suum quousque blada in predictis campis fuerint asportata Et cum fuerint asportata habeant chaciam et cheminum per predictam semitam sine dispendio et molestia hominum de Suttone Ita tamen quod medietas proximi seyllonis que jacet juxta dictam semitam in parte australi et extendit super pratum inperpetuum habeatur pro chacia et chemino predicti Philippi et heredum suorum remanente dicta semita prout ante confectionem hujus conventionis consueverat usque ad terram de Dreycote Et quod dictus Philippus et heredes sui possint impar care et fugare averia de Suttone si contingat ea inveniri in predicto prato tempore defensionis usque ad parcum suum de Dreycote sine contradictione et vexatione predicti abbatis et conventus et successorum suorum et hominum suorum de Suttone per predictas chacias et cheminos et cum necesse fuerit per mediam villam de Suttone quousque sibi de transgressione fuerit satisfactum Preterea homines de Suttone debent infossare si voluerint penes se totam terram suam que extendit super predictum pratum excepto uno pede et dimidio terre sue quod remanebit inter fossatum et pratum ad reparandum fossatum eorum cum necesse fuerit et excepto capite predicti seyllonis quod extendit super pratum unde medietas semper habeatur pro chacia Ita quod dictus Philippus et heredes sui pro insufficienti fossato et clauso de cetero in prato suo per averia de Suttone dampnum non incurrant et si incurrerint per visum proborum hominum emendabitur Et si homines de Suttone per chacias et cheminos predictos per averia predicti Philippi et heredum suorum aut hominum suorum de Dreycote dampnum incurrant per visum proborum hominum rationabiliter emendetur Concessit etiam dictus Philippus pro se et heredibus suis quod nullus habeat pasturam aut communam in predictis pratis nisi ipse et heredes sui et homines sui de Dreycote et predicti homines de Suttone et quod predicti homines de Suttone habeant liberum ingressum et egressum per predicta prata dummodo falcata fuerint et adunata ad aquandum averia eorum sine aliqua contradictione Ita tamen quod in predictis pratis dampna non faciant nec in eisdem pascant ante predictum festum beati Bartholomei Et si contingat quod homines de Suttone contra hanc conventionem et finalem concordiam aliquo tempore fraudulenter et maliciose venire voluerint abbas et conventus et eorum successores eos compellent ad predictorum observationem ita quod predictus Philippus et heredes sui per maliciam aut negligentiam eorum dampnum non incurrant Et ut hec finalis concordia et pax inter partes observetur dicti abbas et conventus et dictus Philippus presentibus scriptis ad modum cyrographi confectis sigilla sua alternatim apposuerunt