Charter Document - 03590473

Nouerint vniuersi hoc presens scriptum visuri uel audituri quod cum anno Domini mcclx sexto die ueneris proxima ante nativitatem Sancti Iohannis baptiste mote fuissent controuersie super homagio releuio secta curie et aliis petitis de vna dimidia hida terre in Euersawe uersus abbatem et conuentum de Bytlisd a priore et conuentu de Luffeld tandem dicte controuersie dicto die sub forma subscripta communi amicorum consilio sunt sopite videlicet quod dicti abbas et conuentus reddent de cetero annuatim dictis priori et conuentui de Luffeld pro dicta dimidia hyda terre cum pertinenciis quam de eis tenent in Euersawe quinque solidos argenti ad duos terminos anni videlicet ad festum sancti Michaelis duos solidos et vi denarios et ad festum sancte crucis in Mayo duos solidos et sex denarios pro omnibus seruicijs consuetudinibus et demandis ad dictos priorem et conuentum pertinentibus Ita quod nec homagium nec releuium nec fidelitatis sacramentum nec curie sectas ratione dicte dimidie hide terre a dictis abbate et conuentu de cetero possint dicti prior et conuentus exigere uel [vendicare] Dicti eciam abbas et conuentus deinceps soluent forinsecum seruicium dicte dimidie hide terre sicut hactenus consueuerunt Defendent insuper omnino et acquietabunt illam dimidiam uirgatam terre cum omnibus pertinencijs suis quam Adam filius Turgis Norh quondam tenuit in Euersawe in omnibus sicuti puram et perpetuam elemosinam set qui eam tenuerit de sectis et adventibus et alijs domino regi pertinentibus que ratione persone exigi poterunt sicut alij libere tenentes in eadem uilla se tenebitur et defendet Dicti vero prior et conuentus reddent de cetero dictis abbati et conuentui pro terra que quondam fuit Roberti de Westmonasterio quam de eis tenent in uilla de Torneb vnum denarium annuatim ad Natalem domini pro omnibus seruicijs consuetudinibus et exaccionibus et demandis ad dictos abbatem et conuentum pertinentibus dictis abbate et conuentu dictis priore et conventu homagium releuium fidelitatem sacramenta curie sectas que ratione dicte terre possint exigi uel uendicari pro se et successoribus suis in perpetuum remittentibus set dicti prior et conuentus forinsecum seruicium acquietabunt sicut huc usque consueuerunt Dicti vero prior et conuentus de cetero sine contradiccione dictorum abbatis et conuentus de Bitlesden decimas de Hedon et de duabus acris in Le Holm sine diminucione aliqua percipient tanquam ad ecclesiam suam de Torneb de iure communi spectantes non obstante aliquo priuilegio inpetrato uel inpetrando per quod dicti abbas et conuentus in retencione dictarum decimarum possent se tueri Et sic dicti abbas et conuentus a solucione duorum solidorum annorum quos dictis priori et conuentui soluere consueuerunt pro dictis decimis quieti erunt in perpetuum scripto super hijs inter eos in modo cyrographi confecto de cetero minime valeturo Si autem contigerit quod tallagium in uilla de Euersawe fieri contingat uel amerciamentum leuari debeat omnes illi qui in franciplegio sunt contribuent tam ad tallagium quam ad amerciamentum celleria quoque dictarum domuum ad hec explenda consensum prestabunt compellendo renitentes Ad hec autem omnia fideliter et absque fraude seruanda dicti religiosi pro se et suis successoribus corporale hinc inde prestiterunt sacramentum Et in huius rei testimonium utraque pars predicta alterius scripto in modo cyrographi confecto sua mutuo apposuere sigilla Hijs testibus dominis Simone de Seinlyz Willelmo Bayuel magistro Iohanne de Sutton magistro Hugone de Wateford Elia de Tingewick Ricardo Grosset Gileberto de Morton Ricardo dicto clerico de Silureston Willelmo de Brandiston de eadem et multis aliis