Charter Document - 03581001

Ic Ælfred Westseaxena cingc mid Godes gyfe et mid þisse gewitnesse gecweðe hu ic ymbe min yrfe wille æfter minum dæge Ærest ic an Eadwearde minum yldran suna þæs landes æt Strætneat on Triconscire et Heortigtunes et þa bocland ealle þe Leofheah hylt et þæt land æt Carumtune et æt Cylfantune et æt Burnhamme et æt Wedmor et ic eom fyrmdig to þam hiwum æt Ceodre þæt hy hine ceosan on þa gerad þe we ær gecweden hæfdon mid þam lande æt Ciwtune et þam þe þærto hyrað et ic him an þæs landes æt Cantuctune et æt Bedewindan et æt Pefesigge et Hysseburnan et æt Suttune et æt Leodridan et æt Aweltune et ealle þa bocland þe ic on Cent hæbbe et æt þam nyðeran Hysseburnan et æt Cyseldene agyfe man into Wintanceastre on þa gerad þe hit min fæder ær gecwæð et þæt min sundorfeoh þæt ic Ecgulfe oðfæste on þam neoðeran Hysseburnan et þam gingran minan suna þæt land æt Eaderingtune et þæt æt Dene et þæt æt Meone et æt Ambresbyrig et æt Deone et æt Sturemynster et æt Gifle et æt Crucern et æt Hwitancyrican et æt Axanmuðan et æt Branecescumbe et æt Columtune et æt Twyfyrde et æt Mylenburnan et æt Exanmynster et æt Suðeswyrðe et æt Liwtune et þa land þe þærto hyran þæt synd ealle þe ic on Wealcynne hæbbe butan Triconscire et minre yldstan dehter þæne ham æt Welewe et þære medemestan æt Clearan et æt Cendefer et þære gingestan þone ham æt Welig et æt Æsctune et æt Cippanhamme et Æðelme mines broðer suna þone ham æt Ealdingburnan et æt Cumtune et æt Crundellan et æt Beadingum et æt Beadingahamme et æt Burnham et æt Þunresfelda et æt Æscengum et Aþelwolde mines broðor suna þone ham æt Godelmingum et æt Gyldeforda et æt Stæningum et Osferðe minum mæge þone ham æt Beccanlea et æt Hryðeranfelda et æt Diccelingum et æt Suðtune et æt Lullingmynster et æt Angemæringum et æt Felhhamme et þa land þe þærto hyran et Ealhswiðe þone ham æt Lambburnan et æt Waneting et æt Eðandune et minum twam sunum an þusend punda ægðrum fif hund punda et minre yldstan dehter et þære medemestan et þære gingstan et Ealhswiðe him feowrum feower hund punda ælcum an hund punda et minra ealdormanna ælcum an hund mangcusa et Æþelme et Aðelwolde et Osferðe eac swa et Æþerede ealdormenn an sweord on hundteontigum mancusum et þam mannum þe me folgiað þe ic nu on Eastertidum feoh sealde twa hund punda agyfe man him et dæle man him betweoh ælcum swa him to gebyrian wille æfter þære wisan þe ic him nu dælde et þam ercebisceope c mancusa et Esne bisceope et Wærferðe bisceope et þam æt Scireburnan Eac swa gedæle for me et for minne fæder et for þa frynd þe he foreþingode et ic foreþingie twa hund punda fiftig mæssepreostum ofer eall min rice fiftig earmum Godes þeowum fiftig earmum þearfum fiftig to þære cyrican þe ic æt reste et ic nat naht gewislice hwæðer þæs feos swa micel is ne ic nat þeah his mare sy butan swa ic wene Gyf hit mare sy beo hit him eallum gemæne þe ic feoh becweden hæbbe et ic wille þæt mine ealdormenn et mine þenigmenn þær ealle mid syndan et þis þus gedælan Þonne hæfde ic ær on oðre wisan awriten ymbe min yrfe þa ic hæfde mare feoh et ma maga et hæfde monegum mannum þa gewritu oðfæst et on þas ylcan gewitnesse hy wæron awritene Þonne hæbbe ic nu forbærned þa ealdan þe ic geahsian mihte Gif hyra hwylc funden bið ne forstent þæt naht forþam ic wille þæt hit nu þus sy mid Godes fultume et ic wille þa menn þe þa land habbað þa word gelæstan þe on mines fæder yrfegewrite standað swa swa hy fyrmest magon et ic wylle gif ic ænigum menn ænig feoh unleanod hæbbe þæt mine magas þæt huru geleanian et ic wylle þa menn þe ic mine bocland becweden hæbbe þæt hy hit ne asyllan of minum cynne ofer heora dæg ac ic wille hyra dæg þæt hit gange on þa nyhstan hand me butan hyra hwylc bearn hæbbe þonne is me leofast þæt hit gange on þæt stryned on þa wæpned healfe þa hwile þe ænig þæs wyrðe sy Min yldra fæder hæfde gecweden his land on þa spere healfe næs on þa spinl healfe þonne gif ic gesealde ænigre wif handa þæt he gestrynde þonne forgyldan mine magas et gif hy hit be þan libbendan habban wyllan gif hit elles sy gange hit ofer hyra dæg swa swa we ær gecweden hæfdon Forþon ic cweðe þæt hi hit gyldan forþon hy foð to minum þe ic syllan mot swa wif handa swa wæpned handa swaðer ic wylle et ic bidde on Godes naman et on his haligra þæt minra maga nan ne yrfewearda ne geswence nan nænig cyrelif þara þe ic foregeald et me Westseaxena witan to rihte gerehton þæt ic hi mot lætan swa freo swa þeowe swaðer ic wille Ac ic for Godes lufan et for minre sawle þearfe wylle þæt hy syn heora freolses wyrðe et hyra cyres et ic on Godes lifiendes naman beode þæt hy nan man ne brocie ne mid feos manunge ne mid nænigum þingum þæt hy ne motan ceosan swylcne mann swylce hy wyllan et ic wylle þæt man agyfe þam hiwum æt Domrahamme hyra landbec et hyra freols swylce hand to ceosenne swylce him leofast sy for me et for Ælflæde et for þa frynd þe heo foreþingode et ic foreþingie et sec man eac on cwicum ceape ymbe minre sawle þearfe swa hit beon mæge et swa hit eac gerysne sy et swa ge me forgyfan wyllan