Charter Document - 03580034
| Charter Number: | 03580034 |
|---|---|
| Cartulary Title: | Charters of the New Minster, Winchester |
| Charter Language: | English |
| Charter Origin: | Religious |
| Charter Type(s): | Agreement |
| Date: | 0983 - 0997 |
| Date type: | Assigned |
| Resource Link(s): |
Anglo Saxon Charters (S 1428) British Library - Add MS 15350 (f116v) British Library - Stowe MS 944 (f40r) eSawyer (S 1428) |
Charter:
Ic Eadwine munuk cilda mæstere an niwan mynstre grete þe wel Ælfsige biscop Ic kyþe þe laford þæt nu for þreon gearan ic læig innan minan portice anbuton nontide et me atewde þær þe halga Cuthbert openlice Ic þæs swiþe bliþe wæs Ic eode to minan abbode Ælfwine et bed hinæ þæt ic moste norþ faran to þan halgan et hine gesecan Ac min abbod Ælfwine me þæs forwirnde et eac forbead Ic þa fæng on minne agænne ræd et eode me þidær norð et me þær Ægelwine bisceop mid weorscipe underfeng et me geuþe God et þe halga þæt ic hine minan handan gewochs et his heafod mid kambe gekemde et his hær mid scearan gæcearf et hine eall myd nywan scrude gescrydde et his ealde claþas him fram genam Sum ic þær let et sum ic her habbe Nu hlaford bæþohte ic me þæt ic nefde mines abbodes leafe et ic þær fore ham gæwende et kom me into ealdan mynstre et gesohte Crist et sancte Peter et sancte Swiðun et þe wolde ac þu nære æt ham Ac ic funde Leofwine þone decanum et ealle þa gebroðra et hi me weorþlice et bliþelice underfengan et me to minan abbode geþingodan et he me bliþelice underfeng Si Gode lof Nu wille ic þæ kyþan hlaford Ælfsige biscop hu þeos cwydrædene fyrmæst wæs staþelod betwyx ealdan minstre et niwan mynstre ealswa ic self hi hyrde þa þæ ic geong wæs Hure hlaford sancte Alwold læig seok et him kom to þe haliga Dunstan of Cantwarabyrig for hine to geneosienne et ure ealder Æþælgar abbod þyder eode et munekas mid him þæt wæs Boia þe ealda et Ælfric decanus et Ælfnoð þe metere et Ælfwine þæ nu abbod is et þær coman munekas of ealdan minstre þæt wæs Ealdwig et Wlstan cantor et Godwine decanus et maniga oþre mid him Þa aras Boia þæ ealda munuk et sæt a cneowan ætforan sancte Aþelwolde et bed hine þæt he scolde settan gode lagan betwyx þan twam mynstran on muneca dagan ealswa Friþestan biscop hæfde geset a preosta dagan þæt wæs þæt þa tweien hiredas weran eall to anan on eallan godcunnesse et þæt wæs gif ænig preost forðferde on aþere steda hi scolde ealle togædere kuman et þæt lic bebirian et eallne þeowdom don þe to Gode belumpe et a cirichalgamdeig þe biþ binnan ealdan mynstre scoldan kuman þa preostas of niwan mynstre to ealdan mynstre et þær beon to efensanga et to uhtsange et to mæssan et to gereorde et þa preostas of ealdan mynstre sceoldan kuman to niwan mynstre æt sancte Iudoces mæssedæge eall on þa ylce wisan et gif ænigan preoste mistimode on aþran mynstre ne fore he nahwider ac gesohte he his neahgeburas et hi him þingadan Þa þis gehyrde sancte Aþelwold þa hæ rede þæt hit swa wære nu on his timan et on þara muneka et cwæþ Godes curs eallan þan þe æfre þis undidan et geaf to tacne þæt hit staþelfæst beon sceolde twa brune mæssehakelan ane into ealde mynstre et oðre into niwan mynstre