Charter Document - 03580017
| Charter Number: | 03580017 |
|---|---|
| Cartulary Title: | Charters of the New Minster, Winchester |
| Charter Language: | English |
| Charter Origin: | Royal |
| Charter Type(s): | Will |
| Date: | 0951 - 0955 |
| Date type: | Assigned |
| Resource Link(s): |
Anglo Saxon Charters (S 1515) British Library - Add MS 82931 (f22r) eSawyer (S 1515) |
Charter:
In nomine Domini Þis is Eadredes cinges cwide Þæt is þænne ærest þæt he an into þære stowe þær he wile þæt his lic reste twegra gyldenra roda et twegra gyldenhiltra sweorda et feower hund punda Þænne an he into Winteceastre to ealden mynstre þreora hama ðæt is þænne Duntune et Domerham et Calne Þænne an he into niwan mynstre þreora hama þæt is þenne Hwerwyl et Andeferas et Clearas et to nunan mynstre Scealdeburnan et Þæcham et Bradanford Þænne an he to nunnan mynstre to Ceastre þritiga punda et þritiga to Wiltune et þritiga to Sceaftesbirig Þænne an he his sawla to anliesnesse et his ðeodscipe to þearfe sixtyne hund punda to þan ðæt hi mege magan hungor et hæþenne here him fram aceapian gif hie beþurfen Þænne fo se ercebiscop æt Cristes Cirican to feower hund pundun Cantwarum et Suþrigum et Suþseaxum et Bearrucscire to fultume et gif þan biscop hwæt tide þænne beo ðæt feoh on þan mynstre on þara witena gewitnesse ðe on þære scire beon et fo Ælfsige biscop to þam biscopstole to Winteceastre to feower hund pundun twa hund to Hamtunscire et to Wiltunscire an hund et oþer to Dorsæton et gif him hwæt tide beo hit swa hit her bufan cwið on þara witena gewitenesse ðe on þære scire beon Þænne fo Dunstan abbod to twam hund pundun et healde æt Glæstingabirig Sumorsæton et Defenun et gif him hwæt tide beo hit swa hit her bufan cwið Þænne fo Ælfsige biscop to twam hund pundum þe þær ofer is et healde æt þæm biscopstole on Winteceastre swilcre scire swilcre þearf sie Þænne fo Oscytel biscop to feower hund pundun et healde æt ðæm biscopstole æt Dorceastre Myrcum swa hit her bufan cwið Þænne hæfð W Wulfhelm biscop ðæt feower hund punda Þanne nime man twentig hund mancusa goldes et gemynetige to mancusan et fo se ercebiscop to anum dæle to oþrum Ælfsige biscop to þriddan Oscytel biscop et gedælen geond þa biscopricea Gode to willan et minre sawle to anliesnesse Þænne an ic minre meder þæs landes æt Ambresbirig et æt Waneting et æt Basingum et ealra minra boclanda þe ic on Suðeseaxum hæbbe et on Suðrigum et on Cent et ealra þæra þe hio ær hæfde Þænne an ic ðam ercebiscop twa hund mancusa goldes beo hundtwelftigum et ælcan minra leodbiscopa hundtwelftiga mancusa goldes et ælcan minra ealdormanna hundtwentig mancusa goldes et ælcan gesettan discðegne et gesettan hræglðene et gesettan biriele hundeahtatig mancusa goldis et ælcan minra mæssepreosta þe ic gesette hæbbe into minum reliquium fiftyg mancusa goldes et fif pund penenga et ælcan þære oþerra preosta fif pund et ælcan gesettan stigweard þritig mancusa goldes et ealcan men preosthades þe geþeodad wæs siþþan ic to anwalde feng et ælcan þæra þe is on minnum hirede si swilcre note nyt swilc he sy buton he sy lit inbyrde to þam cynestolum Þonne wille ic ðæt man nime to ælcan þissa hama twelf ælmesmen et gif hwæt hera ænigan getide sette man þær oþerne to et stande þis eal þa hwile þe Cristendom beo Gode to lofe et minra sawle æleisnesse et gif þis hwa don nelle þonne gange þæt land in þær min lic rest