Charter Document - 03570015
| Charter Number: | 03570015 |
|---|---|
| Cartulary Title: | Charters of St. Albans |
| Charter Language: | English |
| Charter Origin: | Religious |
| Charter Type(s): | Will |
| Date: | 1050 |
| Date type: | Assigned |
| Resource Link(s): |
Anglo Saxon Charters (S 1532) eSawyer (S 1532) |
Charter:
Ðis is Wulfes cwide Ærest ic becweðe for mine sawle Gode et sancte Albane þæt land æt Eastune mid mete et mid mannon swa swa ic hit læne et eallswa þæt land æt Oxawican into þære halgan stowe æt sancte Albane þær ic licgan wille et þæt betste mæssreaf þe ic hæbbe et calic et disc et mæseboc et an hricghrægl ðicoste þæt mon æfre ælcere wucan gemærsige twa mæssan for his sauwle et þone betera pællene cyrtel þe Godgyua ahte et þæne oþerne into Hramesige et iiii marc gewegenes to Rome to sancte Petre et iiii marc gewegenes to bicganne mæssan for mine sauwle et iiii marc gewegenes to heh mynstran her on lande et minon feolagan iiii marc goldes et ealles þæs landes þe ic læfe buto[n] þam twam þe ic Gode hæbbe betæht et sancte Albane et ic ann Oþine ii marc gewegenes seolfres et Sihtrice eorle healf marc goldes Osgode six oran goldes et iiii marc seolfres et his broþer iiii marc seolfres et Dagfinne an marc goldes mare gif he mare geearnaþ et Æfine ii [marc] gewegenes seolfres et an hors et Æþelrice Swegne ii marc et Eadwearde an hors et elles ælc minra hiredcnihta an hors þe nan land nabbaþ et Þorode þam litlan ii gewegenes et healde Saxa þæt cild et þæt feoh oððe befæste into sumum mynstre mid þam feo et gif þær hwæt belife on golde oððe on seolfre oððe on rægle hæbbe se mæst þe me betst to geearnaþ et mæst fore mine sauwle don wille et xxx manna frige mon for mine sauwle