Charter Document - 03540014
| Charter Number: | 03540014 |
|---|---|
| Cartulary Title: | Charters of Sherborne |
| Charter Language: | English |
| Charter Origin: | Religious |
| Charter Type(s): | Lease |
| Date: | 1007 - 1014 |
| Date type: | Assigned |
| Resource Link(s): |
Anglo Saxon Charters (S 1422) British Library - Add MS 46487 (f16v) eSawyer (S 1422) |
Charter:
Her swutelaþ on þisum gewrite þæt Eadmund æþeling bæd þone hyred æt Scireburnan þæt he moste ofgan þæt land æt Holancumbe ða ne dorste se hyred hym þæs wyrnan ac cwæþon þæt hy þæs wel uðon gyf se cing et se bisceop þe heora ealdor wæs þæs geuðon Ða gewærþ hym et se æþeling et se prafost et þa yldostan munecas comon to þam cinge et him fore cyddon et his leafe bædon et þæt ærende abead Wulfstan archebisceop Ða cwæð se cing þæt he nolde þæt þæt land mid ealle ut aseald wære ac þæt hi elles swilce foreword worhton þæt þæt land eft in to þære halgan stowe agifen wære to þam fyrste þe hym ealle gewurde Ða gewearþ hi þæt se Æþeling sealde þam hyrede xx punda wið þam lande ælswa hit stod mid mete et mid mannon et mid ællon þingon et bruce his dæg et ofer his dæg eode þæt land eft in to ðære halgan stowe mid mete et mid mannon et mid eallum þingum swa swa hit ðonne wære Ðises wæs to gewitnesse Wulfstan archebisceop et Lyfing bisceop et Æþelric bisceop et Æþelsie bisceop et Eadric ealdorman et Æðelmer ealdorman et Æþelfand Æþelmeres suna et Leofsuna abbud æt Cernel et Ælfget Hengþes suna et Siwærd et Brihtric reada et ealle þa ildostan ðægnas on Dorsæton et Ealdwine preost et Wulfric preost et Lofwine æþelinges disc þen et Ælfget et Ælwerd his cnihtas et ealle þege oþre hired men