Charter Document - 03540006
| Charter Number: | 03540006 |
|---|---|
| Cartulary Title: | Charters of Sherborne |
| Charter Language: | English |
| Charter Origin: | Royal |
| Charter Type(s): | Grant |
| Date: | 0864 |
| Date type: | Internal, A.D. |
| Resource Link(s): |
eSawyer (S 333) |
Charter:
Libertas qvam Athelbertvs Rex concessit Scireburnensi Ecclesie + Regnante in perpetuum domino nostro Ihesu Christo Ricsiendum urum Dryhtne hælendum Criste in ecnisse ðæm hiehstan et ðæm untosprecendlican ealra þinga et ealra tida scippende se þe on manegum ðingum his mihtum setteþ et waldeð Eac swylce ðam ure hefenlican et þæm unasecgendlican rice þætte he ðisses lifes eadinysse et gesælinysse on ænigum þingum ne forlæte For þon ic Æþelbreht mid Godes gife Westsaxna kyning witoðlice ic þence et me on gemynde is mid þissum eorþlicum ðingum þa ecelican gestreon to begitanne Sicut Salomon dixit redemptio anime proprie diuitie Swa swa Salomon cwæþ ðæt we sceoldon mid urum spedum urum saulum þa ecen gesælinesse begitan For þon ic cuþlice mid geðeahte et mid geðafonge et leafe minre biscepa et ældormanna et nohte þon læs minra broðera Æþelredes et Ælfredes et ealra þara selestena witona ures rices Ic forgyfo for me selfne et for mine þa liofestan lifiende frynd et eac swylce for arwuþnesse Æþelwulfes saule mines fæder et Æþelbaldes mines broþor soþlice þisne freols to þære halgan stowe æt Scireburnan ðær Æþelbaldes cyninges lichama hine resteð þæt hit sy fæstlice et unanwended et ecelice gefreod alra cynelicra et alra domlicra þeowdoma ge ðeoffenges ge æghwelcre ieðnesse ealles worldlices broces nymþe fyrde et brycge weorces Gyf hwa þonne sye þæt he hine for Godes lufan to þan geeaðmedan wille þæt he þas ure gyfe geieacnan wille oððe gemonifældan wille geiece him ælmihti God eal god her on worlde et his dagas gesundfulle Gyf þanne hwilc man to þan geþristlæce oððe mid deofles searwum to þam beswicen sye þæt he þis on ænigum þingum lytlum oððe myclum þence to gebrecanne oððe to onwendanne wite he þonne þæt he þæs riht agieldende sie byforan Cristes ðrymsetle þonne ealle hefonware et eorþware on his andweardnesse beoð onstyrede et onhrerede nymþe he hit ær her on worlde mid ryhte gebete Ðis wæs gewriten þæs gære þe wæs agan fram Cristes acennednesse eahta hund wintra et feower et sixtig et in þam tacencircole þæt twelfte gear ðe dæg wæs septimo kalendis Ianuariis Þis wæs gedon in þam cynelican setle on þære stowe ðe is genæmned Dornwara ceaster beforan þissum witum geþafigendum þe hære namon her benioþan gewritene et gesewene siondon + Ic Æþelbreht cyning mid þære halgan rode tacne þis het swiþe geornlice getrymman et gefæstnian + Ic Alhstan episcopus + Ic Eanwulf dux + Ic Ælfstan dux + Ic Æþelred filius regis + Ic Ælfred filius regis + Ic Osmund minister + Ic Wulfhere minister + Ic Alhhard abbas + Ic Heahmund presbiter + Ic Hwita prepositus + Ic Cyma minister + Ic Wulfred minister + Ic Ecgbreht minister + Ic Monnel minister + Ic Eadwulf minister + Ic Wistan minister + Ic Æþelwulf minister + Ic Wynsige minister + Ic Goda minister + Ic Coenwald minister + Ic Æþelric minister + Ic Wulfhelm minister + Ic Beocca minister + Ic Æþelmod minister + Ic Beorhtnoþ minister + Ic Denegils minister + Ic Hunred minister + Ic Ecgulf minister + Ic Ælfhere minister