Charter Document - 03530031

Wynflæd cyð hu hio wile ymbe þæt hio hæfð ofer hyre dæg hio becwiþ into cyrcan hyre ofring[]u and hyre beteran ofringsceat and hyre rode and into beodern hiwun twa selefrene cuppan and hyre to saulsceatte ælcon godes þeowe mancos go[ld]es and butan þam Ceoldryþe i mancus and Oðelbryhte and Else and Æþel[]þe and an pund to Wiltune þam hiwum and Fugele anne mancus and hio becwið Æðelflæde hyre dehter hyre agrafenan beah and hyre mentelpreon and þæt land æt Ebbelesburnan and þa boc on ece yrfe to ateonne swa hyre leofosð sy and hio [an h]yre þara manna and þæs yrfes and ealles þæs þe þær þenne on bið butan þæt man scel for hyre saulle þærof don ægþer ge an mannon ge an yrfe and æt Ceorlatune hio hyre an ealswa þere manna and þæs yrfes b[ut]an þam freotmannon and þæt man finde of þam yrfe æt Ceorlatun[e healfes] pundes wyrþne saulsceat to Mylenburnan and healfes pundes wyrþne saulscet fram Cinnuc to Gyfle and Eadmære þæt land æt C[ol]les[h]ylle and æt Inggeneshamme and hio an him eac þæs landes æt Faccancu[mbe þe] hyre morgengyfu wes his dæg and ofer his dæg gyf Æþelflæd leng lybbe þonne he þonne fo hio to þam lande æt Faccancumbe and ofer hyre dæ[g g]a hit eft an Eadwoldes hand and gif god wille þæt Eadwold weorþe to þam ge[w]exen an his fæder dæge þæt he land healdan mæge þene bid ic Eadmær þæt he him læte þara twega landa oþer to oþþe æt Colleshyll[e] oð æt Ead[b]urggebyrig and ofer his dæg buta and hio wile þæt man finde æt Inggenesham[me h]ealfes pundes wyrþne saulsceat to Waneting for hy and æt Colleshylle and finde man of þam yrfe lx penegga wyrð to Scrifenanhamme lx to Colleshylle lx to Cillariðe and freoge man Wulfware folgyge þam þe hyre leofo[st] sy[] ttryðe ealswa and freoge man Wulfflæde on þæt gerad þæt hio folgige Æþelflæde and Eadgyfe and hio becwið Eadgyfe ane crencestran and ane sem[estra]ne oþer hatte Edgyfu oþer hatte Æþelyfu and freoge man Gerburge and Miscin and Hi lf and Burhulfes dohtur æt C[in]nuc and Ælfsige and his wif and his yldran dohtor and Ceolstanes wif and æt Ceorlatune freoge man Pifus and Edwyn [] and []n wif and æt Faccancumbe frioge man Edelm and Man and Iohannan and Sprow and his wif and En[] f[] and Gersande and Snel and æt Colleshylle freoge man Æþelgyþe and Bican wif and Æffan and B[e]dan and Gurhannes wif and freoge man Wulfwarei swystor Byrhsigis wi[f] and [] þysne wyrhtan and Wulfgyþe Ælfswyþe dohtor and gif þær hwylc witeþeow man sy butan þyson þe hio geþeowede hio gelyfð to hyre bearnon þæt hi hine willon lyhtan for hyre saulle and Ælfwolde hyre twegen wesendhornas and an hors and hyre reade ge[t]eld [and] hio becwyðk Eadmære ane hlidfæsþe cuppan oþre Æðelflæde and bit þæt hi findon betweox him twa smicere scencingcuppan [i]nto beodern for hi oþþe hyre ahgene ieredan cuppan geiccon hy sy[] an anon punde þonne wolde hio þæt man dyde innon ægþere cuppan healf pund penega and agyfe man Eadwolde his ag[e]ne ii sylerenan cuppan and hio becwið him hyre goldfagan treowena[n] cuppan þæt he ice his beah mid þam golde oþþe hi mon æt him gehweorfe mid xvi mancussum reades reades goldes swa micel þær is to gedong and hio becwiþ him twa mydrecan and þæraninnan an bedreaf eal þæt to anum bedde gebyreð and agyfe Eadmær Eadwolde swa micel yrfe and swa fela manna swa[] him ær æt Hafene becwæð and [h]e his fæder syððan swa he wille and be þan lande æt Cinnuc hit agon þa hiwan æt Sceaftesbyrig ofer hyre dæg and hio ah þæt yrfe and þa men þenne an hio þan hywum þara gebura þe on þam gafollande sittað and þera þeowra manna hio an hyre syna dehter Eadgyfe and þæs yrfes butan þam saulsceatte þe man to Gifle syllan sceal and hio wile þæt man læte on þan lande standan vi oxsan and iiii cy mid feower cealfon and of [þa]m þeowan mannan æt Cinnuc hio becwið Eadwolde Ceolstan Etstanes sunu and Æffan sunu and Burhwynne Mærtin and Hisfig and hio becwiþ Ead[gy]fe þærangean Ælfsige þene coc and Ælfware Burgan dohtor and Herestan and his wif and Ecelm and his wif and hiora cild and Cynestan and Wynsige and Byrhtrices sunu and Edwynne and Buneles sunu and Ælfferer dohtor and hio becwið Æðelf[læde] Elhhelmmes dehter Ælfferes dohtor þa geonran and hyre twilibrocenan cyrtel and oþerne linnenne oþþe linnenweb and Eadgyfe twa mydrecan and þæranin[n]an hyre betsþe bedwahrift and linnenne ruwan and eal þæt bedref þe þærto gebyreð and hyre betstan dunnan tunecan and hyre beteran mentel and hyre twa treowenan gesplottude cuppan and hyre ealdan gewiredan preon is an vi mancussum and sylle man hyre iiii mancussas of hyre sa[] bege and an lang healwahrift and oþer sceort and þrio sethrægl and hio an Ceoldryþe hyre blacena tunecena swa þer hyre leofre beo and hyre betsð haliryft and hyre betsþan bindan [and Æþelf]læde þisse Hwitan hyre cincdaðenan cyrtel and cuffian and bindan and finde Æðelflæd syþþan an hyre nunscrude loce hwæt hio betsð mæge Wulfflæde and Æþelgife and ice mid golde þæt hyra ægþer hyru hæbbe lx peneng[a wyr]þ and Ceolwynne and Edburge þæt sy xxx penega wyrþ and þær synt twa micle mydercan and an hræglcysð and an lytulu towmyderce and eac twa ealde mydercan þenne an hio Æþelflæde on ælcum þingum þe þær unbecweden bið on bocum and an swilcum lytlum and hio gelyfð [þ]æt hio wille hyre saulle geþencan and þær synt eac wahriftu sum þe hyre wyrðe bið and þa læstan hio mæg syllan hyre wimmannon and hio becwið Cynelufe hyre dæl þera wildera horsa þe mid Eadmæres synt and hio an Æþelflede hyre hy[]ppe and þara andlumena and ealra þera getæsa þet þærbinnan beoð and eac ðæs worþiges gif his hyre se cing an swa swa Eadweard cing ær his Byrhtwynne hyre meder geuþe and hæbbe Eadwold and his sweostor hyre taman hors g[e]mæn [] his agene toforan