Charter Document - 03510034
| Charter Number: | 03510034 |
|---|---|
| Cartulary Title: | Charters of Rochester |
| Charter Language: | English |
| Charter Origin: | Religious |
| Charter Type(s): | History |
| Date: | 0995 |
| Date type: | Assigned |
| Resource Link(s): |
eSawyer (S 1458) University of Manchester Medieval Collection - Textus Roffensis (p301) |
Charter:
Uuldeam sal sapientiae + Þus wæron ða seox sulung æt Wuldaham Sancte Andrea geseald into Hrofesceastre Æðelbryht cinc hit gebocode þam apostole on ece yrfe et betæhte hit ðam biscope Eardulfe to bewitenne et his æftergæncan ða betweonan þam wearð hit ute et hæfdon hit cynegas oð Eadmund cinc ða gebohte hit Ælfstan Heahstaninc æt ðæm cince mid hundtwelftigan mancesan goldes et ðrittigan pundan et ðæt him sealde mæst eal Ælfeh his sunu æfter Eadmunde cincge ða gebocode hit Eadred cinc Ælfstane on ece yrfe þa æfter Ælfstanes dæge wæs Ælfeh his sunu his yrfewærd et þæt he beleac on halre tungon et ofteah Ælfrice his breðer landes et æhta butan he hwæt æt him geearnode ða for ðære broðorsibbe geuðe he him Earhiðes et Crægan et Ænesfordes et Wuldahames his dæg ða oferbad Ælfeh ðæne broðor et feng to his læne þa hæfde Ælfric suna Eadric hatte et Ælfeh nænne ða geuðe Ælfeh þam Eadrice Earhiðes et Crægan et Wuldahames et hæfde himsylf Ænesford þa gewat Eadric ær Ælfeh cwideleas et Ælfeh feng to his læne ða hæfde Eadric lafe et nan bearn þa geuþe Ælfeh hire hire morgengife æt Crægan et stod Earhið et Wuldaham et Lytlanbroc on his læne ða him eft geðuhte ða nam he his feorme on Wuldaham et on ðam oþran wolde ac hine geyflade et he ða sænde to ðam arcebiscope Dunstane et he com to Scylfe to him et he cwæþ his cwide beforan him et he sette ænne cwide to Cristes cyrican et oðerne to Sancte Andrea et ðane ðriddan sealde his lafe ða bræc syððan Leofsunu ðurh þæt wif ðe he nam Eadrices lafe ðæne cwide et herewade þæs arcebiscopes gewitnesse rad ða innon ða land mid þam wife butan witena dome þa man þæt ðam biscope cyðde ða gelædde se biscop ahnunga ealles Ælfehes cwides to Earhiðe on gewitnesse Ælfstanes biscopes on Lundene et ealles þæs hiredes et ðæs æt Cristes cyrican et ðæs biscopes Ælfstanes an Hrofesceastre et Wulfsies preostes þæs scirigmannes et Bryhtwaldes on Mæreweorðe et ealra East Cantwarena et West Cantwarena et hit wæs gecnæwe on Suþ Seaxan et on West Seaxan et on Middel Seaxan et on East Seaxan þæt se arcebiscop mid his selfes aðe geahnode Gode et sancte Andrea mid þam bocan on Cristes rode ða land þe Leofsunu him toteah et ðæne aþ nam Wulfsige se scirigman ða he nolde to ðæs cinges handa et þær wæs god eaca ten hundan mannan ðe þane að sealdan