Charter Document - 03460133
| Charter Number: | 03460133 |
|---|---|
| Cartulary Title: | Charters of Abingdon Abbey |
| Charter Language: | English |
| Charter Origin: | Religious |
| Charter Type(s): | Will |
| Date: | 1002 - 1005 |
| Date type: | Assigned |
| Resource Link(s): |
eSawyer (S 1488) |
Charter:
Her sutelað hu Alfric arcebiceop his cwyde gedihte þæt is ærest him to saulsceate he becwæð into Cristes cyrcan þæt land æt Wyllan et æt Burnan et Risen beorgas and he becwað his laford his beste scip et þa segelgeræda þarto et lx healma et lx beornena et he wilnode gif hit his lafordes willa wære þæt he gefaestnode into sancte Albane þæt land æt Cynges byrig et fenge sylf wið þam eft to Eadulfingtune An he becwæð þæt land æt Dumeltun in to Abbandune et Ælfnoðe þarof iii hida his dæg et suððan to þan oþaran to Abbandune et x oxan et ii men he him becwæð et filgan hi þam laford scype þe þæt land to hyre And he cwæð þæt land æt Wealingaforda þe he gebote Celewærde et hofer his dæg in to Ceolesige et he becwæð in to sancte Albane þæt land æt Tiwan et standan þa forword betweonan þan abbode et Ceolrice ðe ær wið ðæne arcebiscop geforwyrd wæran þæt is þæt Ceolric habbe ðæne dæl þæs landes þe he hæfð his dæg et eac þæne dæl þe se arcebiscop for his sceatte him to let þæt wæs ehtoðe healf hid wið v pundun et l mancusum goldes et ga hit ofer his dæg eall togædere into sancte Albæne et heora forewyrd wæron þæt Osanig æfter Ceolrices dæge gange eac þyderin et þæt land on Lundene þe he mid his feo gebohte he becwæð into sancte Albæne et his bec ealle he cwæð eac þyderin et his geteld And he becwæð þæt man fenge on þe feoh ðe man hæfde et ærest ælcne borh agulde et suððan tilode to his hergeatwæn þæs ðe man habban sceolde And anes scipes he geuþe þam folce to Cent et oþres to Wiltunescire et elles on oðrum þingum gif þæs hwæt wære he bæd þæt Uulfstan bisceop et Leofric abbud dihton swa heom best ðuhte And þe land be westan æt Fittingtune et æt Niwantune he becwæð his sweostrun et heora beornum et Ælfheages land Esnes suna ga a on his cyn And he becwæð Uulfstane ærcebiscope ane sweorrode et anne ring et anne psaltere et Alfheage biscope anne rode And he forgeaf on Godes est Centingan þæne borh þe hy hym sceoldan et Middelsexon et Suðrion þæt feoh þæt heom foresceat And he wyle þæt man freoge æfter his dæge ælene witefæstne man þe on his timan forgylt wære Gif hwa þis awende hæbbe him wið god gemæne Amen