Charter Document - 03444368
| Charter Number: | 03444368 |
|---|---|
| Cartulary Title: | Norwich 1289-1299 Volume 41 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1291 |
| Date type: | Internal, Calendar, Papal |
| Resource Link(s): |
Reference Document for this Embedded Document |
Charter:
Nicholaus episcopus servus servorum Dei venerabili fratri archiepiscopo Cantuariensi salutem et apostolicam benedictionem Dura nimis et amara valde discrimina Terre Sancte que sibi prout dolentes referimus nuper intulit vis hostilis presentibus tibi non duximus exprimenda relatibus cum illa tue prudentie per alias nostras literas seriosius referamus Sane ad recuperandam de manibus impii terram ipsam ferventibus studiis prout eius urgentissima necessitas exigit intendentes et cupientes ut illa recuperata stabiliter conservetur ad laudem divini nominis et honorem viam et modos varios et diversos exquirimus per quos nostrum in hac parte valeat desiderium adimpleri unde cum fide dignorum pandat assertio quin potius communis vox habeat quod dilectos filios fratres Hospitalis sancti Iohannis et militie Templi Ierosolimitani ad unius ordinis unitatem seu religionis unionem auctoritate apostolica reducamus ut sincerius et uniformius in vinculo caritatis et pacis tendentes ad unum efficacius possint persequi negotium memoratum super quorum unione hactenus etiam tempore Lugdunensis concilii specialis mentio et collatio facta fuit Volumus et per apostolica scripta tibi mandamus quatinus cum suffraganeis episcopis tuis in provinciali concilio quod a te fieri volumus prout tibi per alias literas nostras iniungimus habito super hoc concilio diligenti et exacta cum illis deliberatione secuta nobis quod per te ac eosdem suffraganeos deliberatum fuerit in hac parte plene fideliter seriatim et expresse per tuas literas harum seriem continentes tuoque sigillo munitas procures quamtotius intimare Dat apud Urbem Veterem xv kalendas Septembris pontificatus nostri anno iiii