Charter Document - 03441309

Edwardus Dei gratia rex Anglie dominus Hibernie et dux Aquit venerabili in Cristo patri R eadem gratia episcopo Norwycensi salutem Cum nos vacante nuper sede ecclesie vestre Robertum de Barnedissche clericum ad ecclesiam de Merston vacantem presentaverimus per quod per litteras nostras sigillo nostro quo tunc utebatur in Anglia sub testimonio dilecti consanguinei et fidelis nostri Edmundi comitis Cornubie locum nostrum in Anglia tunc tenentis custodi spiritualitatis dicti episcopatus vestri demandatum fuit quod ipsum Robertum ad eandem ecclesiam admitteret quam quidem presentationem antequam idem Robertus aliquam possessionem dicte ecclesie adeptus fuisset ex certa conscientia nostra penitus et expresse revocavimus ac dilectum clericum nostrum magistrum Hugonem de Derby ad eandem ecclesiam presentavimus vobis mandantes quod ipsum Hugonem ad prefatam ecclesiam admitteretis predicta prima presentatione de predicto Roberto facta non obstante ac vos occasione cuiusdam custodie illius ecclesie dicto Roberto ut dicitur commisse prefatum Hugonem clericum nostrum ad predictam ecclesiam hucusque admittere distuleritis quo minus idem Hugo effectum presentationis nostre de ipso facte ut optamus est assecutus in ipsius Hugonis dispendium non modicum et nostri iuris preiudicium manifestum quod nullatenus poterimus sustinere vobis mandamus sicut alias mandavimus firmiter iniungentes quod ammoto predicto Roberto a predicta ecclesia prefatum Hugonem sine more dispendio ad eam admittatis iuxta tenorem prioris mandati nostri vobis pro ipso directi scituri quod nisi presens mandatum adimpleveritis cum effectu nos ad baroniam vestram capiemus pro contemptu nobis in hac parte facto Quid igitur inde feceritis per latorem presentium litteris vestris nobis constare faciatis Teste me ipso apud Cantuar xvii die Augusti anno regis nostri decimo septimo per ipsum regem de consilio suo