Charter Document - 03440362
| Charter Number: | 03440362 |
|---|---|
| Cartulary Title: | Norwich 1289-1299 Volume 41 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1298 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis Cristi fidelibus ad quos presentes littere pervenerint Radulphus permissione divina Norwicensis episcopus salutem in Domino sempiternam Noverit universitas vestra quod cum inter religiosos viros dominos priorem et conventum Norwic ex parte una et dominum Robertum de Fouldon rectorem ecclesie de Magna Cressingham nostre diocesis ex altera super quadam annua pensione quatuor marcarum et quibusdam aliis iurisdictionibus ipsam ecclesiam de Cressingham contingentibus fuisset suborta diversimode materia questionis demum partibus presentibus et se submittentibus nostris ordinationi et decreto pure sponte et absolute intellectis diligenter et profunde examinatis que partes proposuerunt hinc inde ponderatis ponderandis et pensatis pensandis in hac parte demum habentes pre oculis sic ordinamus et decernimus quod predicti prior et conventus de ipso domino Roberto rectore ecclesie predicte et suis successoribus perpetuis temporibus dictam annuam pensionem quatuor marcarum ab antiquo debitam et consuetam terminis statutis antiquitus videlicet in festis sancti Michaelis sancti Andree Pasche et Nativitatis sancti Iohannis Baptiste pro equalibus portionibus solvendam integre percipiant sicut hactenus percipere consueverunt Et ut omnis discordia et contentio sit sopita volumus ordinamus et decernimus quod annuatim imperpetuum eisdem terminis similiter pro equalibus portionibus a dicto domino Roberto et eius successoribus qui pro tempore fuerint duos solidos percipiant in incrementum pensionis antedicte ita quod nichil iurisdictionis in ipsa ecclesia seu parochia eiusdem quantum ad forum ecclesiasticum in posterum aliquo iidem prior et conventus exigere valeant seu vendicare quoquo modo Volumus etiam ordinamus et decernimus quod idem rector et sui successores inperpetuum quo ad excessus subditorum corrigendum in parrochia memorata iurisdictionem ecclesiasticam habeant et exerceant sine omni contradictione eorundem prioris et conventus et eosdem excessus prout Dominus eis inspiraverit corrigant et reforment Et ut premissa robur optineant firmitatis duo scripta inde fieri fecimus quorum unum remanet penes predictos priorem et conventum sigillo nostro et sigillo dicti domini Roberti signatum et aliud penes eundem dominum Robertum sigillo nostro et predictorum prioris et conventus similiter remanet sigillatum Data apud Hevyngham vii kalendas Februarii anno Domini millesimo CC nonagesimo septimo et consecrationis nostre nono