Charter Document - 03440332
| Charter Number: | 03440332 |
|---|---|
| Cartulary Title: | Norwich 1289-1299 Volume 41 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1299 |
| Date type: | Internal, A.D., Calendar |
| Resource Link(s): |
|
Charter:
Excellentissimo principi ac domino suo reverendo domino Edwardo Dei gratia regi Anglie illustri domino Hibern et duci Aquit Radulphus permissione divina Norwicensis ecclesie minister salutem in eo per quem reges regnant et principes dominantur Cum Letitia dicta de Burgo de Fouldone nostre dyocesis auctoritate nostra ordinaria propter suam contumaciam multiplicatam pariter et offensam manifestam maioris excommunicationis sententia sit innodata et in eadem per quadraginta dies et amplius perseveraverit et adhuc perseverare non formidet animo indurato claves sancte matris ecclesie pertinaciter contempnendo et gregem dominicum nequiter contaminando ac ecclesia Dei nil habeat ultra quid faciat in hac parte celsitudinem vestram regiam rogamus attente quatinus dictam excommunicatam per potestatem brachii secularis compescere dignemini ut quam Dei timor a malo non revocat potestatis secularis severitas cohibeat a peccato Vigeat et valeat excellentia vestra regia per tempora semper prospera et longeva Dat apud Terlingg xii kalendas Iunii anno Domini millesimo CC nonagesimo nono