Charter Document - 03440306
| Charter Number: | 03440306 |
|---|---|
| Cartulary Title: | Norwich 1289-1299 Volume 41 |
| Charter Language: | Latin |
| Charter Origin: | Religious |
| Charter Type(s): | Inspeximus, Ratification |
| Date: | 1299 |
| Date type: | Internal, A.D., Calendar |
| Resource Link(s): |
|
Charter:
Universis Cristi fidelibus ad quos presentes littere pervenerint Raduphus permissione divina Norwicensis episcopus salutem in Domino sempiternam Noverit universitas vestra quod cum religiosi viri prior et conventus de Castelacra qui ecclesiam de Methelwolde in proprios usus optinent super portionibus retinendis et aliis assignandis perpetuis vicariis in eadem ecclesia de Methelwolde perpetuo servituris se nostre ordinationi et decreto submiserint pure sponte et absolute invocata spiritus sancti gratia sic ordinamus et decernimus quod predicti prior et conventus capitale mesuagium quod antiquitus fuit rectoris eiusdem ecclesie totam terram dominicam ad dictam ecclesiam spectantem omnes decimas garbarum et bladi cuiuscumque generis in tota parochia predicta retineant et habeant imperpetuum Totum vero residuum excepta portione quam iidem prior et conventus de Castelacra nomine prioris et conventus Lewen in eadem parochia percipiunt assignavimus integre ad sustentationem vicariorum qui pro tempore deservient ecclesie memorate unacum mesuagio predictorum prioris et conventus de Castelacra quod est ex opposito ecclesie de Methelwolde prelibate Omnia vero onera ordinaria sustinebunt vicarii qui pro tempore fuerint preter refectionem et reparationem cancelli cuius onus incumbet priori et conventui de Castelacra memoratis et extraordinaria utraque pars supportabit et agnoscet pro rata sue portionis salvo nobis et successoribus nostris iure augmentandi mutandi et detrahendi cum nobis et ipsis expediens esse videbitur et salubre In cuius rei testimonium has litteras nostro et predictorum prioris et conventus de Castelacra sigillis roboratas et dupplicatas fieri fecimus patentes quarum una remanet penes predictos priorem et conventum de Castelacra et alia in ecclesia de Methelwolde prelibata pro iure vicariorum futurorum plenius omni tempore declarando Dat apud Eccles ii nonas Augusti anno Domini millesimo CC nonagesimo nono