Charter Document - 03431183
| Charter Number: | 03431183 |
|---|---|
| Cartulary Title: | Norwich 1266-1288 Volume 40 |
| Charter Language: | Latin |
| Charter Origin: | Religious |
| Charter Type(s): | Foundation, Grant |
| Date: | 1121 - 1145 |
| Date type: | Assigned |
| Resource Link(s): |
Reference Document for this Embedded Document |
Charter:
Eborardus Dei gratia Norwycensis episcopus archidiaconis suis Guillelmo Rogerio Walkelino Guillelmo et Rogerio decano et parochianis suis de Norfolc et de Sudfolc salutem Sciatis meo iussu et auxilio monachos sancte Trinitatis Norwycensis in libera possessione sancte Trinitatis edificasse hospitale intra Norwycum ad sustentationem pauperum Dei pro salute anime mee et pro salute omnium benefactorum loci illius et ecclesiam de sancto Paulo iuxta hospitale Et quicumque ipsam ecclesiam in festivitate sancti Pauli in estate per octo dies cum oblationibus elemosinarum vel pio cordis affectu requisierint remitto eis ex divina largitione et nostra auctoritate xl dies de iniuncta sibi penitentia omni anno Nullus vero predicto hospitali vel in eius possessione habitantibus vel rebus suis super pacem Dei et nostram iniuriam vel aliquam contumeliam in aliquo inferat sed sint liberi et quieti in perpetuo ab omnibus consuetudinibus et querelis in pace Dei et nostra sicut decet elemosinam Dei Et omnes in hospitali vel in possessione hospitalis manentes in predicta ecclesia sancti Pauli servitium Dei audiant et securi Dominum laudent et pro nobis et pro omnibus Cristianis vivis atque defunctis deprecentur Secretarius autem sancte Trinitatis det omni anno ad opus iam dicte ecclesie chrisma et oleum sanctum Et ut hec constitutio rata et firma permaneat eam sancte crucis inpressione et sigilli mei appositione confirmo atque corroboro Valete