Charter Document - 03430276
| Charter Number: | 03430276 |
|---|---|
| Cartulary Title: | Norwich 1266-1288 Volume 40 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1283 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis sancte matris ecclesie filiis ad quos littere presentes pervenerint Willelmus permissione divina Norwicensis ecclesie minister humilis salutem in Domino sempiternam Ut fidelium devotio per allectiva indulgentiarum munera ad pietatis opera Deo gratia salubriter excitetur nos gratiam celitus nobis datam impertiri fidelibus populis cupientes de misericordia summe et individue Trinitatis omnipotentis Dei patris et filii et spiritus sancti gloriose virginis Marie genetricis Dei sancti Iohannis Baptiste et beatorum Petri et Pauli apostolorum ac sanctorum martirum Laurentii et Thome omniumque sanctorum Dei meritis confidentes omnibus parochianis nostris et aliis quorum dioecesani hanc nostram indulgentiam ratam habuerint de peccatis suis vere contritis et confessis qui ad monasterium sancti Benedicti de Hulmo accesserint precesque suas in ecclesia dicti monasterii Deo devoti effuderint seu de bonis sibi a Deo collatis ad ipsius ecclesie fabricam quicquam devote contulerint pia mente quadraginta dies de iniuncta sibi penitentia misericorditer relaxamus Datum apud Rollesby sexto nonas Martii anno Domini MCCLXXX secundo et consecrationis nostre anno quinto