Charter Document - 03430271

En le honor de Deu pere et fiz et seynt esperit nus Williame per la suffraunce de Deu eveske de Norreviz e patrun de la meson de dames de Flixtune du dun la noble dame dame Margerie de Crek pource ke nus avoms veu devers estatuz ordenez par lavaundite dame dame Margerie e par acuyns de nos predecessurs afermez des queus akuyns pourrunt amendement receyure e plus sauvement estre establis pour celes ke garder les devievint En primes chef ordenuns e establissoms ke en la mesun de Flixtune seient diseoyt dames veeleys a queles nus entendums ke les biens queus la dame les ad done que les acres ke puis lur sunt acruz iekes altens ke la patronage fu par le dun meimes la dame al esglise de Norrviz eas esvesk du lyu donez deivent suffire Pur quei nus ordenons ke nule dame utre ceu numbre en cele mesun ne seit receivez si les bens de la mesun ne seent acruz a cinkaunte souz out[] biens ke ore aparmeimes isunt e de nostre especial assent ou des esveskes ke apres nus serrunt E sil avenge ke nule dame de ce noumbre moerge si tost cum covenablement pourra estre fet seit autre mis en son lyn ke convenable sit a cele companie en la furme avauntdite E si les biens a creessen plus utre tuz iuts a la quantite de cynkaunte souz seit une dame recuve pour lalme de noble dame dame Margerie de Crek e ces auncestres e ses eyrs e ces successurs Ordenons ausynt e etabliuns ke deus chapelains iseent dunt le un face le servise sicum la seysun del an demaundera e le autre chapelayn chaunte especiaument ou especial memorie face por le alme a la noble dame dame Margerie de Crek ke la mesun fundat e pour ces auncestres et pour ces eyres e pour ces successurs Derenchef ordenuns e establisons ke nule prioresse ne autre de la mesun ne mette custages ne despens en en ces pare[n]z dunt la mesun sit charge ou greve Derenghef ordenuns e establiuns ke a tut dis seit done la dime du payn e dela cervoyse des blez ke cressent en vos teres denzeynes et foreynes e des blez ke de vos vendrunt a vostre mesun a povere gent de religiun et a autre commun poveres solum Deu saunz regard de parenz de prioresse ou de autre dame si honeste enchesun ne seit pour quei om deit tens plus largement regarder Ordenuns ausint e establiuns ke des dimes ke vus avet ou averet en eglises apropriez sauve les custages ke en eus mettrent seit la dime dome a poveres de parosses Et si lesglise vaille vynt mars demy marc seit chescun au mis en amendement de urnemenz del esglise ou desvestent ou de liveres ou de acune autre chose honeste e si lesglise vaille plus seit plus done sulum meymes la quantite e si nule esglise sit vende a quele vos devet presenter covenable homme i seit presente pour les almes garder ke pusse par en sunple de bone vie et sage par bone aprise ces parochiens enfurmer Derechef ordenuns et e establiuns ke vus en vostre encloistre puyssent overir choses ke a urnemnz de seinte iglise apendent e pour vos necessitez issi ke nule chose a a seruler vus ne facet ne autre vanite E de vos overainnes devez rendre a cunte a chef de la semeine a vostre priuresse ou a cele ke vostre ordre gardera Derechef ordenuns ke nule noneyne dame de vostre mesun ne voist par pays saunz renable enchesun de maladie de parent ou de amy ou de autre busugnable enchesun e duncke ne voysent fors en la cumpanie la noble dame dame Margerie de Crek tant cum ele vivera ou de la priuresse ou de aunciene dame de meure porture ke pusse les plus ievenes riveler e endoctriner tantg cum eles sunt hors e dunc lur sit iur assigne par la prioresse de revenir al quel eles deyvent revenir si eles ne seent desturbet par renable enchesua E si eles ne vignent al iur ne neeyent desturbance deyvent estre amende en chapitre par la descreciun la priuresse Derechef ordenuns ke nule dame nuneyne ne dune ne receyve dun saunz cunge de la priuresse ne est presente ne nul bref ne envoye ne receyve ketinge clos taunt kele leit mustre a la prioresse ou la gardene si la priuresse ne sit presente Derechef ordenuns ke nule dame noneyne ne maniuwe hors de la mesun environ a deus lines forpris mesun de religiun de dames ou oueke eveske ou autre prelat ou amis ou parenz certeyns des queus nule suspiciun ne deit estre Derechef ordenuns ke la priuresse deuz fez par an de ces baillifs et de ces obedienceres en presence de quatre damesdes plus sages et luives par le covent owe ces acuntes E si elle truveke la mesur seit grevosement en dette dunt sustreie de ces riules e de son convent e del autre meigne Derechef ordenuns si prioresse seit depose par la folie nul avantage ne eyt devant ses sores mes si par age ou par maladie dunc li seit pourveu honourable ly a solum son estat e les eisemenz de la maison e reverence e honour li seit porte de tut le covent et nul reproche se seit fete a prioresse ke seit depose par []sun ke ce seit tant cum ele demuere en la cumpaigne Derechef ordenuns ke nule obediencere ne autre soer de leurz ne eit serure ke la priuresse ne puysse ala volunte cercher e veer ce ke les unt en garde Derechef ke nul livere de la convaunt ne nul baudekyn ne drap de or ne seit preste hors saunz commun assentdel covent Derechef nule ne seyt resuwe en nostre mesun deki ne seit renable espeir kele deyve estre covenable a Deu servir e ala companie e de ce seit enquis en chapitre de tutes les en vertu de obedience ke de ce dient leur verite et sient esprove par un an avaunt keles receyvent le abit si par renable enchesun ne seit lesse Derechef nus ordenuns ke les dames seent aconnumyees le iur de Nuel de Paskes e de Pentecoste del assumpciun e de la nativite e de la chaundelure le iur de tuz seynz seynt Iohan le Baptiste e seynte Katerine ke est lur avowe si eles ne sentent en bon estat de cors et de alme Derechef nus ordenuns ke nule femme seculere ne isiriurne saunz congie de nus ou esveske ke serrunt apres nus fors petits enfaunz e damoiseles ke vient estre en religiun Ordenuns aussint e establiuns ke les noneines ne usent nul drap de culur fors sullement lur mainitens teynt en neyre e la pelure de neir aigneus et lur cuver turs en dortur seent de blancket e la furure de aigneus mes que la priuresse en la chambre e les noneynes quant eles serrunt hors de lur mesun dussunt coverir lur lys de chalons et la priuresse eit poer de doner cunge a hommes de entrer en vostre clos par ces enchesuns a processiun a devenir frere en chapitre pur visiter noneyn malade cum prestre ou fisicien ou parent ou honestes amys e honeste genz ke unt desir de ver vos estres par dedenz e pur oyr sermun ou overus pur fere ce ke covenable est a fere de deu E checun apres la mort la noble dame dame Margerie de Crek seit sun aniversarie tenu en ceste manere de la man la celerere seit livere par la priuresse ala pitancere cinckaunte souz et ke ele pesse tute la mayngne dedenz et de hors et dime de offrendes a la messe ce ke remeint la iurne sit done a poveres de la vile e chescun an deu fez face la priuresse par sey ou par autre enquere de la meygnye ke il seent de honeste conversyun e de chaste e ces ke serrunt trovez cupables de lecherie seent hostez en covenable tens si il nyeit espeyr de bon amendement apres Dorechef nus ordenuns pur ce ke nus avons trove les dames de nostre mesun ke profeces sunt fet une profession autre ke les seint perres ne establirent ne en canon ne seit trove ke lur profession sit fete par teu paroles je sur tele noneyne promet ma establete e convirsiun de mes moins e obedience selum la reule seint Austine devaunt Deu et devaunt ces seynz en ceste esglise de Flixtune ke est establie en le honur de notre dame e seinte Katerine en le presence de vos tel eveske celes ke avaunt cest tens unt en autre furme lur professiun fetes ou autre estatuz de ce ke passe ceste force les assoluiuns Ces estatuz establiuns nus enteu furme ke ne seent une garde par professiun sauve ces ke en la reule seint Austin sunt contenuz mes par obedience Issint ke celes ke les passerunt ne seent liez a morteu peche mes apenaunte la quele la priuresse eit pover a emoyndre a celes ke en la garde sunt de ce ke les tuchent e de ces ke tuchent la priuresse le esveske especiaument eit pouer de li emoyndre penaunce ou celi a ki il sun pover durra E ke ceste chose par curs de tens ne isse de memorie ces estatuz en remenbraunce dezuz nostre seel avoms mys