Charter Document - 03430255
| Charter Number: | 03430255 |
|---|---|
| Cartulary Title: | Norwich 1266-1288 Volume 40 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1283 |
| Date type: | Internal, A.D. |
| Resource Link(s): |
|
Charter:
Serenissimo principi domino suo reverendo domino Edwardo Dei gratia regi Anglie illustri domino Hibernie et duci Aquitannie Willelmus eiusdem permissione Norwicensis ecclesie minister salutem in eo per quem reges regnant et potentes reddunt iustitiam Cum Philippus dictus clericus de Len Alicia filia eiusdem Philippus Willelmus Chepesheved Alexander Lamberd Robertus de Acra Claricia le Tarter et Walterus de Dockyngg de Len nostre dioecesis auctoritate nostra ordinaria propter suam multiplicatam contumaciam et offensam pariter manifestam maioris excommunicationis sententia sint innodati et in eadem per quadraginta dies et amplius perseveraverint et adhuc perseverent animo indurato claves sancte matris ecclesie pertinaciter contempnendo et gregem dominicum nequiter contaminando ac ecclesia Dei nil habeat ultra quid faciat in hac parte celsitudinem vestram regiam rogamus attente quatinus dictos excommunicatos per potestatem brachii secularis compescere dignemini ut quos Dei timor a malo non revocat potestatis secularis severitas cohibeat a peccato Valeat dominatio vestra reverenda per tempora diuturna Datum apud Fyncham vi idus Februarii anno Domini MCCLXXX secundo