Charter Document - 03430214
| Charter Number: | 03430214 |
|---|---|
| Cartulary Title: | Norwich 1266-1288 Volume 40 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1279 |
| Date type: | Internal, A.D., Calendar |
| Resource Link(s): |
|
Charter:
Serenissimo principi domino suo reverendo domino Edwardo Dei gratia regi Anglie illustri domino Hibernie et duci Aquitannie Willelmus eiusdem permissione Norwicensis episcopus salutem in eo per quem reges regnant et potentes reddunt iustitiam Cum Thomas de sancto Edmundo et Robertus de Paston clerici nostre dioecesis auctoritate nostra ordinaria propter eorum multiplicatam contumaciam pariter et offensam maioris excommunicationis sententia sint innodati et in eadem per quadraginta dies et amplius perseveraverint claves ecclesie contempnendo et adhuc perseverare non formident animo indurato gregem dominicum nequiter contaminando ac ecclesia Dei nil habeat ultra quid faciat in hac parte celsitudinem vestram regiam rogamus attente quatinus dictos excommunicatos per potestatem brachii secularis compescere dignemini ut quos Dei timor a malo non revocat potestatis secularis severitas cohibeat a peccato Valeat dominatio vestra reverenda per tempora diuturna Datum apud Northelmham xv kalendas Augusti anno Domini MCCLXX nono