Charter Document - 03430201
| Charter Number: | 03430201 |
|---|---|
| Cartulary Title: | Norwich 1266-1288 Volume 40 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1279 |
| Date type: | Internal, A.D., Calendar |
| Resource Link(s): |
|
Charter:
Universis Cristi fidelibus ad quod presens scriptum pervenerit Willelmus Dei gratia Norwicensis ecclesie minister humilis eternam in Domino salutem Inter preclaros Cristi confessores quorum presentia corporalis Anglicane patrocinatur ecclesie beatus Cuthbertus non mediocre sanctitatis preconium dinoscitur optinere nec immerito laudibus humanis attollitur cuius meritis infirmi sanitatis gratiam consequuntur cuius caro carie carens et prorsus integra perseverans dormientem potius quam mortuum preservare videtur Membra namque beati viri incorrupta penitus manere non solum venerabilis Bede scripta testantur verum etiam quamplurima sanctorum asserunt testimonia et ipsius sacratissimi corporis translatio evidentissime comprobavit Nos igitur tanti confessoris considerantes insignia de misericordia summe et individue Trinitatis omnipotentis Dei patris filii et spiritus sancti gloriose virginis Marie genetricis Dei et beatorum Petri et Pauli apostolorum ac beatorum martirum Laurentii et Thome et sancti Cuthberti confessoris omniumque sanctorum Dei meritis confidentes omnibus parochianis nostris et aliis quorum diocesani hanc nostram indulgentiam ratam habuerint de peccatis suis vere contritis et confessis qui ad feretrum eius devotionis et orationis causa advenerint et de bonis sibi a Deo collatis feretro suo cum devotione aliquid attulerint quadraginta dies de iniuncta sibi penitentia misericorditer relaxamus Dat apud Dunelm nonas Martii anno Domini MCCLXX octavo