Charter Document - 03430197
| Charter Number: | 03430197 |
|---|---|
| Cartulary Title: | Norwich 1266-1288 Volume 40 |
| Charter Language: | Latin |
| Charter Origin: | Religious |
| Charter Type(s): | Remission |
| Date: | 1281 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis sancte matris ecclesie filiis ad quos presentes littere pervenerint Willelmus permissione divina Norwicensis ecclesie minister humilis salutem in Domino sempiternam Sacrosancta sanctorum limina visitare et ea pietatis studio venerari coram Altissimo gratum credimus acceptum ob quod ad id mentes fidelium eo libentius indulgentiarum muneribus excitamus quo magis Cristo credentibus proficit ad salutem Quapropter de misericordia summe et individue Trinitatis omnipotentis Dei patris et filii et spiritus sancti et gloriose virginis Marie genetricis Dei sancti Iohannis Baptiste et beatorum Petri et Pauli apostolorum ac sanctorum martyrum Laurentii et Thome omniumque sanctorum meritis confidentes omnibus parochianis nostris et aliis quorum diocesani hanc nostram indulgentiam ratam habuerint de peccatis suis vere contritis et confessis qui ad fabricam ecclesie seu domuum fratrum ordinis sancti Augustini de Clare de bonis sibi a Deo collatis pie contulerint subsidia caritatis seu manus porrexerint adiutrices ac etiam qui ibidem in festo nativitatis Domini Paschatis Pentecostes beatissime virginis Marie sancti Augustini et beatorum Petri et Pauli patronorum eorundem et per octavas predictorum festorum orandi causa devote adierint et orationem dominicam cum salutatione angelica dixerint pia mente viginti dies de iniuncta sibi penitentia misericorditer relaxamus omnes indulgentias a quibuscumque episcopis catholicis ob causas predictas fratribus memoratis prius concessas et in posterum concedendas ratificantes et quantum ad nos attinet tenore presentium approbantes Dat apud Wikes iii nonas Augusti anno Domini MCC octuagesimo primo et consecrationis nostre anno quarto