Charter Document - 03430180

Universis sancte matris ecclesie filiis ad quos presens scriptum pervenerit Rogerus permissione divina episcopus Norwicensis salutem in Domino sempiternam Accedentes ad nos dilecti in Cristo filii Hamon magister et fratres hospitalis sancti Egidii de Norwico sua nobis petitione monstrarunt quod cum bone memorie Walterus predecessor noster in ecclesia Norwicensi zelo caritatis succensus dictum hospitale ad laudem Dei et sustentationem pauperum et oppressorum fundaverit idem Walterus ibidem statuit quandam formam eligendi magistrum dicti hospitalis que si observaretur in non modicum dampnum et gravamen ipsius hospitalis redundaret necnon in ipsorum fratrum fastidium et regule sibi tradite dissolutionem verteretur cuius siquidem electionis forma talis est decedente vero vel recedente dilecto in Cristo Hamone de Calethorp nunc magistro hospitalis eiusdem circa electionem magistri hanc formam volumus perpetuis temporibus observari Defuncto magistro et eius corpore tradito sepulture vel etiam alias eo cedente vacatio hospitalis per duos fratres nuntiabitur priori ecclesie Norwicensis et ipse prior archidiaconos Norwic et Norfolch huius nostre ordinationis auctoritate protinus evocabit ut certo die infra tres septimanas numerandas a morte magistri vel cessionis ipsius apud Norwicum in ipso hospitali conveniant de futuri magistri creatione unanimiter tractaturi et hii tres facta prius inquisitione diligenti per fratres ipsius hospitalis iuratos super ydoneitatem presbiterorum in eodem hospitali commorantium de ipsis presbiteris aut etiam aliis forensibus prout eis secundum Deum et suas conscientias visum fuerit expedire ad regimen dicti hospitalis personam congruam et honestam eligent et assument quem episcopo Norwicensi infra octo dierum spatium post electionem celebratam per suas litteras presentabunt quod si episcopus Norwicensis tunc fuerit extra regnum persona electa presentabitur officiali Norwicensi qui ipsum sicut et episcopus sine obstaculo cuiuslibet contradictionis admittet Si autem dicti archidiaconi ad diem assignatum non convenerint ipsos per duos dies proximo sequentes volumus expectari et si non venerint taliter expectati dictus prior associatis sibi officiali consistorie Norwicensis et decano Norwicensi procedet in dicto negotio ea vice sicut procedere deberet cum archidiaconis antedictis et eandem formam volumus observari si dictos archidiaconatus tunc vacare contigerint Si autem unum archidiaconatum tunc vacans fuerit vel unum archidiaconum tamen abesse contigerit tunc prior cum archidiacono presente associato sibi dicto officiali consistorie vel decano in negotio procedat secundum formam superius recitatam et eandem formam ab ipsis archidiaconis volumus observari si prior noluerit convenire cum eisdem vel prioratum tunc vacare contingat Volumus etiam si vacante prioratu Norwicensi magistrum hospitalis cedere contingat vel decedere vacatio eiusdem hospitalis dictis archidiaconis protinus nuntietur ut ipsi ad eligendum magistrum in forma prescripta conveniant et accedant quod si prior et alii numerati infra quinque septimanas postquam corpus magistri dicti hospitalis traditum fuerit sepulture vel post cessionem eiusdem in personam certam ut premisimus non consenserint episcopus Norwicensis illa vice de persona ydonea hospitali provideat memorato Dicti igitur magister et fratres dampna et gravamina ipsius hospitalis necnon fastidia et regularum sibi traditarum dissolutionem formidantes nobis tanquam loci dyocesano et patrono dicti hospitalis humili prece supplicarunt ut certiori et utiliori breviori et regulari discipline congruentiori eligendi forme assensum preberemus pariter et consensum videlicet ut cedente vel decedente magistro dicti hospitalis presbiteri qui in eodem hospitali fratres perpetui fuerint personam ydoneam de seipsis vel etiam aliis forensibus prout eis secundum Deum et suas conscientias visum fuerit expedire ad regimen dicti hospitalis eligere valeant iuxta canonicas sanctiones et regularis discipline observantias Nos igitur tam numerum presbiterorum fratrum dicti hospitalis quam eiusdem facultates accrevisse seriatimque accrescere perpendentes necnon considerantes quod per formam communiter in electionibus observatam tutius et citius quam per convocationes forensium qui vitas fratrum dicti hospitalis ignorant poterit in premissis dicto hospitali providere et ob hoc pium esse eorum super hoc condescendere voluntati communicato virorum prudentium consilio petitioni dictorum magistri et fratrum in hac parte benignum assensum duximus impertiri ad hoc facilius excitati quod dicti prior et archidiaconi potestate eis in hac parte commissa minime functi sunt nec alicui electioni interfuerunt in hoc casu nec etiam dictum hospitale postquam fuerit fundatum hucusque vacaverit In cuius rei testimonium sigillum nostrum huic scripto duximus apponendum Dat ii idus Augusti anno Domini millesimo ducentesimo septuagesimo secundo et pontificatus nostri anno septimo