Charter Document - 03430167

Universis sancte matris ecclesie filiis ad quos presentes litere pervenerint Rogerus miseratione divina Norwycensis episcopus salutem in Domino sempiternam Ad universitatis vestre notitiam tenore presentium pervenire volumus quod nos ecclesiam de Carleton Forhowe cum omnibus suis pertinentibus cuius advocatio ad religiosas mulieres abbatissam et moniales de Marham nostre dioecesis ordinis Cysterciensis spectare dinoscitur eisdem abbatisse et monialibus divine caritatis intuitu contulimus sibi et successoribus suis in proprios usus perpetuis temporibus possidendam salva nobis et successoribus nostris nominatione ydonee persone ad vicariam predicte ecclesie et eiusdem vicarii collatione quotiens ipsam vacare contigerit Et ut portio vicarii a decimis et bonis ipsarum monialium in predicta ecclesia sit discreta ipsam in rebus et obventionibus subscriptis duximus taxandam Consistit autem vicaria predicta in toto alteragio integro unacum quinque acris terre et duodecim denariis annui redditus ad ipsam ecclesiam spectantibus percipiet adhuc dictus vicarius qui pro tempore fuerit de bonis predictarum monialium in predicta ecclesia quinque quartario frumenti et undecim quartario ordei singulis annis ad festum sancti Martini et ad festum inventionis sancte crucis pro equalibus portionibus percipienda Cancellum vero ipsius ecclesie cum coopertorio et aliis necessariis tam moniales quam vicarius inter se sustentabunt pro equalibus sumptibus apponendis Omnia autem onera ordinaria debita et consueta sustinebit vicarius antedictus Extraordinaria siquidem onera si que emerserint sustinebunt et solvent ambe partes et quelibet earum pro sue rata portionis salvis etiam nobis et successoribus nostris in omnibus iure episcopali et ecclesie Norwycensis dignitate In huius rei testimonium presenti scripto sigillum nostrum fecimus apponi Datum apud Theford iiii nonas Iulii anno Domini MCC septuagesimo quarto