Charter Document - 03430064
| Charter Number: | 03430064 |
|---|---|
| Cartulary Title: | Norwich 1266-1288 Volume 40 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1275 |
| Date type: | Internal, A.D. |
| Resource Link(s): |
|
Charter:
Excellentissimo domino Edwardo Dei gratia regi Anglie illustri domino Ybernie et duci Aquitannie Rogerus permissione divina Norwycensis episcopus salutem et debite subiectionis reverentiam Cum Reginaldus filius Willelmi de Reymes de Briseworth et Ricardus peliparius de Parva Thornham in sententia excommunicationis auctoritate ordinaria late per quadraginta dies et amplius iam steterint et adhuc in eadem claves ecclesie contempnendo in proprie salutis dispendium et multorum secum communicantium periculum pertinaciter perseverare non formident dominationi vestre supplicamus [quatinus] cum ecclesia Dei non habeat ultra quid faciat quod vestrum est in hac parte exequi dignemini ut quos Dei timor a malo non revocat saltem potestas secularis cohibeat a peccato Vigeat et valeat nobis dominatio vestra per tempora diuturna Datum apud Thornegg nonis Iulii anno Domini MCCLXX quinto