Charter Document - 03430014

Rogerus Dei gratia Norwycensis episcopus dilectis in Cristo filiis abbatibus prioribus archidiaconis et eorum officialibus decanis rectoribus vicariis capellanis parochialibus et aliis ac ceteris omnibus et singulis tam laycis quam clericis per civitatem et dyoecesim Norwycensem constitutis salutem gratiam et benedictionem Cum in conspectu altissimi quam placitum sit et acceptum ecclesias construere et constructas fovere in quibus laus Dei extollitur honor sanctorum excolitur et venia peccatorum postulatur ac ecclesia sancte Radegundis Cantebrig Elyensis dyoecesis ubi sanctimoniales Deo dedicate vigiliis orationibus et ieiuniis ac aliis misericordie operibus nocte dieque ad Dei laudem et honorem insistunt per campanilis sui subversionem et subitam ruinam tot et tantos patetur defectus quod nisi fidelium elemosinis subveniatur eidem divinum ministerium more solito propter paupertatem dictarum sanctimonialium prefatos defectus supplere non valentium honorifice et debito modo non poterint exequi in eadem vobis mandamus in virtute obedientie firmiter iniungentes quatinus cum nuntii dictarum sanctimonialium ad vos venerint fidelium elemosinas petituri ipsos benigne admittatis negotium ipsarum per sacerdotes ecclesiarum parochianis nostris diligenter exponi facientes et quod collatum fuerit ipsis fideliter et sine qualibet diminutione sub pena anathematis liberari faciatis Eo magis dictarum sanctimonialium negotium cordi nobis existit quod earum penuria non paucis innotescit Datum apud Hoxne v kalendas Maii anno gratie MCCLXX septimo et pontificatus nostri anno duodecimo