Charter Document - 03421345

Robertus permissione divina Cantuar archiepiscopus totius Anglie primas venerabili fratri Ricardo dei gratia London eipscopo salutem et fraternam in domino caritatem Transacti temporis pariter et moderni adversa consilio cuius status instabilis iugiter immutatur nonnulla pericula frequenter inducens exigente utilitate ac pro animarum salute necessitate multiplici ecclesie perugente officii nostri sollicitudinem excitat et compellit prelatorum et cleri nostre provincie convocationem pro temporis oportunitate facere generalem quam sicut res expostulabat diu antea preconceptam emergentium varie impedimentorum nostrorum discrimina inopinata iuxta propositum nostrum nequaquam fieri hactenus permiserunt Quocirca fraternitati vestre committimus et firmiter iniungendo mandamus quatinus cum celeritate debita omnes et singulos coepiscopos et suffraganeos nostros in nostra Cantuar provincia constitutos convocando citetis seu citari faciatis peremptorie ac per eosdem episcopos vice et auctoritate nostra citari mandetis similiter peremptorie in singulis dyocesibus omnes decanos precentores cancellarios thesaurarios archidiaconos priores cathedralium ecclesiarum et abbates non exemptos ac etiam omnes [] priores perpetuos et electivos plenum conventum habentes prepositos magistros seu custodes conventualium et collegiatarum ecclesiarum et alios universos in dignitate constitutos capitula quoque conventus et collegia omnium predictorum et clerum singularum dyocesum videlicet ut dicti episcopi decani precentores cancellarii thesaurarii archidiaconi abbates priores magistri custodes et alii in dignitate ut premittitur constituti in virtute obedientie personaliter singula vero capitula conventus et collegia tam secularium quam religiosorum predictorum per unum sue conditionis et ordinis clerus autem cuiuslibet dyocesis Anglie per duos procuratores Wallie vero per unum sufficienter compareant apud Novum Templum London in crastino ascensionis Domini proximo venturo cum diebus sequentibus continuandis eidem usque ad finalem ipsorum expeditionem in hac parte una nobiscum efficaciter tracturi ac etiam ordinaturi quid ad honorem Dei et reformationem status ecclesie animarumque salutem in hac parte consultius sit agendum et ad ea que ex communi deliberatione concorditer providebuntur statuentur aut fient suum adhibituri consensum facturique ulterius quod pro communi utilitate omnium et singulorum divina inspirante gratia visum fuerit oportunum Et vos ipsi quo ad vos et subditos vestros hoc ipsum mandatum nostrum in singulis suis articulis similiter observetis denuntiantes dictis episcopis et per eos suis subditis denuntiari expressius facientes quod absentes in dicto termino cessante inevitabili impedimento de quo evidenter et legitime doceri volumus ut ius exigit graviter pro contumacia puniemus Personis quoque ecclesiasticis exemptis infra provinciam nostram predictam existentibus cuiuscunque fuerint ordinis status vel conditionis quos sicut de ceteros premissa contingunt seu contingere poterunt in forma prescripta quod absque preiudicio suorum privilegiorum compareant loco et temporibus prenotatis per vos et alios coepiscopos nostros denuntietis et denuntiari sollicite faciatis De die vero receptionis presentium et quid feceritis in premissis ac de nominibus sic citatorum et premunitorum in cedula separata certificatorio vestro annexa conscriptis quatenus ad vos attinet nos dictis die et loco plene et distincte certificare curetis et ceteris coepiscopis pretactis ut nos similiter de suo facto singuli ad diem sub eadem forma ydonee certificent districtius iniungatis per suas patentes literas harum seriem continentes Dat apud Mortelak iii id Aprilis anno Domini MCCC secundo consecrationis nostre octavo