Charter Document - 03420246

Excellentissimo domino suo domino Edwardo Dei gratia illustri regi Anglie domino Hybernie et duci Aquitannie Ricardus eiusdem miseratione London ecclesie minister salutem et properos ad vota successus cum omni reverentia et honore Ecclesia vestra sancti Pauli London ad cuius regimen licet immeriti divina disponsatione vocamur tam vestris quam clare memorie progenitorum vestrorum regum Anglie Deo et ecclesie sue sancte devotorum temporibus preteritis eiusdem regni vasalis prerogativam libertatis optinuit et in suis iuribus regie protectionis cum favore munimentum verum licet loca quedam adiacentia muris cimiterii ecclesie memorate tumulandis interdicti tempore nobilium corporibus decedentium ibidem antiquorum industria reservata fuissent sicut ad huc existentes extra dictos muros tumuli veraciter attestantur per quos etiam loca huiusmodi sacra seu religiosa censentur ac magna pars aree extra muros eiusdem ubi tumuli non apparent quam olim edificatam inhabitabant clerici ecclesie prenotate ad ius et proprietatem ipsius pertineat Henricus tamen Wallensis maior civitatis London curie vestre falso suggerens quod sine alieni iuris preiudicio ad augmentum redditus pontis London in dictorum murorum circuitu domunculas vel seldos possint construi et maiestate regio taliter circumventa literas vestras vestrum exprimentes in hac parte consensum ut dicitur impetrans propositum quod ad suggestionem iniqui spiritus iam concepit nititur nequius consummare et licet ex causis premissis et aliis congruis et legitimis que pro loco et tempore poterunt declarari iuri liberati et possessioni ecclesie nostre grave et intolerabile videntes praeiudicium generari tam per nos quam per alios eundem maiorem et cives London sibi adherentes in premissis moneri fecimus et frequenter induci ut a proposito tam sacrilego desisterent et iidem spretis monitionibus huiusmodi in presumptione pristina perdurantes tanquam manifesti perturbatores libertatum et invasores possessionem ecclesiasticarum forent non immerito animadversione debita compescendi ob vestri tamen et literarum vestrarum quas super hoc exhibent reverentiam ab omni rigore ecclesiastice discipline contra eos exercende hucusque cessavimus fiducialiter sperantes erga vestram clementiam in hoc consequi remedium Propter quod maiestati vestre attentius applicamus quatinus ne ius libertas ecclesie vestre sancti Pauli per maioris et civium predictorum potentiam opprimantur vobis pro statu rei puplice agentibus in remotis ipsis precipere velitis ut salutem a constructione domunculam huiusmodi omnino desistant donec ad partes London quod Deus prospere et celeriter annuat redeatis ut tunc de ecclesie vestre iustitia et adverse partis iniuris coram vobis et vestris discussio pleniorum habeatur Et quia sicut excellentia vestra satis novit manifestas ecclesie Dei iniurias at oppressiones dissimulare quantum ad nos pertinet absque ordinis nostri non valemus periculo quas ex officii debito tota reprimere diligentia et virtute tenemur vestre clementie ea que possumus supplicamus instantia quatinus Dei contemplatione sustinere velitis ut dictos maiorem et cives presumptione predicta per censuram ecclesiasticam compescere cum vestra pace possimus si illorum rebellio et protervitas hoc requirant Bene valeat vestra dominatio per tempora longiora Datum apud Suthminstr ii kalendas Augusti anno domini MCCLXXXII