Charter Document - 03411069

Innocentius episcopus servus [servorum dei] venerabilibus fratribus Lincoln London et Wellens episcopis salutem et apostolicam benedictionem Ad memoriam et observantiam perpetuam contra gravamina que in procurationibus ratione visitationis debitis inferebantur subditis a prelatis providerunt salubriter canonica instituta circa evectionum et personarum multitudinem epularum immoderatam et alias superfluitates statuendo modestiam debitam observari ut nec in exigendo nimium prelati excedant nec in exhibendo superflue subditi gravarentur fietque visitatio ad salutem animeque letitiam et non afflictionem tediumque subditorum Unde quia nonnulle adhuc de huiusmodi procurationibus audiuntur querimonie nos tamen volentes pastorali sollicitudine providere taliter in hac parte ut tollatur omnis occasio gravandi et cesset prorsus materia murmurandi auctoritate apostolica statuimus ut archiepiscopis episcopis archidiaconis aliisque prelatis personaliter visitantibus ab ecclesiis visitatis et locis exhibeantur procurationes in victualibus et necessariis moderate ita quod hec secundum communem rerum estimationem singulorum locorum vel sumptus qui pro hiis fient summam vel valentiam quatuor marcarum argenti in nulla procuratione transcendunt Proviso tamen quod secundum maiorem vel minorem personarum vel evectionum numerum pro maioritate vel minoritate prelatorum in consilio Lateran taxatorum fiant usque ad summam ipsam vel infra huiusmodi procurationum expense sed in locis in quibus maior fertilitas vel copia rerum habetur et ubi maiores sunt redditus et ecclesiastice facultates minus secundum ampliorem necessariorum ubertatem et parvitatem proventuum in istis procurationibus expendantur Si autem amplius in huiusmodi procurationibus fuerit expensum prelati eas recipientes restituere in utilitatem ecclesiarum a quibus ipsas receperunt et illi qui eas exhibuerunt erogare de suo proprio pauperibus in duplum eius quod taliter et ultra expensum fuerit compellantur et alias nihilominus pena puniantur si visum fuerit expedire ceteris nihilominus que pro talibus visitationibus seu procurationibus generaliter statuta esse noscuntur manentibus semper salvis Nulli ergo [] Data Perusii vi idus Iulii pontificatus nostri anno nono anno domini MCCLII