Charter Document - 03410212

Universis sancte matris ecclesie filiis ad quos littere presentes pervenerint Iohannes miseratione divina London episcopus salutem in Ihesu Cristo Profectibus eorum quos seculo relicto sub sancte religionis disciplina divinis obsequiis ac operibus misericordie iugiter constat inherere propensiori studiose diligentori sollicitudine debet episcopalis auctoritas vigilanter intendere ut sufficientia vite subsidia possidentes opera pietatis plenius exequi et quietius et devotius Cristo valeant sinceris mentibus militare Considerantes igitur honestatem et piam in Domino conversationem religiosorum virorum fratris Reginaldi abbatis et conventus ecclesie de sancte Crucis Waltham sancte Crucis et bona que vigent in monasterio suo tam in exhibitione pauperum quam receptione hospitum ibidem confluentium quam etiam in exertitio aliorum caritatis operum diligenter attendentes ecclesiam de Suthwalda que est de patronatu suo vacantem cum omnibus ad eam pertinentibus prefate ecclesie de Waltham et fratri Reginaldo abbati eiusdem et canonicis ibidem deo servientibus et futuris imperpetuum confirmamus in proprios usus possidendam ad elemosinarum largitionem et alia pietatis opera que inibi potissmie vigent plenius et commodius sustinenda salvis nobis et successoribus nostris iurisdictioni et diocesana lege in predicta ecclesia de Suthwelda cum pertinentiis suis necnon sufficienti et honesta sustentatione perpetui vicarii qui in eadem ecclesia ministrabit Vicariam autem ecclesie memorate que de voluntate et expresso consensu predictorum abbatis et conventus ad nostram et successorum nostrorum necnon sede London vacante ad decani et capituli London collationem pertinet et perpetuo pertinebit iam vacantem dilecto in Cristo filio Hugoni de Frisby capellano conferimus intuitu caritatis et ipsum perpetuum vicarium instituimus in eadem Idem vero vicarius et successores sui percipient et libere sine alicuius inquietatione possidebunt nomine vicarie sue antiquum mansum vicarii ac omnia et singula in decimis predialibus sive personalibus seu quibuscumque obventionibus aut incrementis undecumque provenientia ratione ecclesie predicte prout bone memorie Fulco quondam London episcopus predecessor noster dudum ordinavit Et preter hec duodecim acras terre arabilis iuxta mansum suum cum libero chimino seu via eundi cum equis et carectis ab eodem manso usque ad ecclesiam predictam ac etiam omnimodas decimas tam maiores quam minores de dominico abbatis et conventus de Stratford quod habuerunt in parochia predicta tempore confectionis presentium cum omnibus aliis ipsius ecclesie proventibus preter solas garbas residuas quas memorati abbas et conventus percipient et hiis contenti existent Vicarius autem predictus et successores sui sustinebunt omnia onera ordinaria tam episcopalia quam archidiaconalia preter dedicationem ecclesie et refectionem cancelli que prefati religiosi de Waltham unacum extraordinariis oneribus pro rata sustinebunt Et ut per nos et successores nostros ad hec cum opus fuerit compelli valeant ordinamus quod omnes illorum decime provientes ex predicta ecclesia in fundo ipsius ecclesie videlicet in grangiis que fuerunt rectoris eiusdem et non alibi futuris temporibus reponantur ut autem hec nostra collatio et ordinatio perpetue firmitatis robur optineant presentes litteras in modum cyrographi confectas quarum una pars penes nos et alia penes dictos abbatem et conventum tertia pars penes decanum et conventum London et quarta penes predictum vicarium et successores suos remanebunt fieri fecimus et nostri ac predictorum abbatis et conventus sigillorum impressionibus communiri Hiis testibus dominis Herveo de Borham decano nostro London Rogero de la Legh archidiacono Essex magistro Radulpho de Ivingho officiali nostro Radulpho de Baudac dominis Waltero de Essex Iohanne de Walton Rogero de Bestorp Mattheo de Warchne et aliis Dat apud Copford quinto Kal Februarii anno gratie millesimo ducentismo LXX quarto et consecrationis nostre primo