Charter Document - 03410210

Universis presentes litteras inspecturis I[ohannes] Dei gratia London episcopus salutem in Domino Noverit universitas vestra quod cum sanctissimus in Cristo pater dominus Gregorius nonus universalis ecclesie summus pontifex religiosis viris priori et conventui monasterii beate Marie Thefford Cluniacen ordinis Norwicen diocesis ecclesiam de Alba Nutteleya London diocesis in qua idem religiosi ius patronatus habebant concesserit ut ipsius cedente vel decedente rectore possent in usus proprios retinere prout hec indulgentia sedis apostolice inter alia continentur ac postmodum dominus Alexander papa quartus eiusdem domini Gregorii successor religiosi viri domino abbati sancti Edmundi ordinis sancti Benedicti Norwicen diocesis suis litteris dederit in mandatis ut ipsos religiosos vel procuratorem eorum suo nomine in corporalem possessionem ipsius ecclesie rectore cedente vel decedente induceret defenderetque inductos prout in descripto apostolico evidentius hec apparent sicque postmodum Radulpho de Maydenstan ipsius ecclesie quondam rectore viam universe carnis ingresso idem religiosi secundum indulgentiam sedis apostolice memorate eandem ecclesiam in usus proprios retinentes auctoritate predicta in possessionem ipsius inducti fuerant per commissarium memorati abbatis eamque tenerint aliquamdiu pacifice et quiete tenentes tamen quia possessionem predictam nobis in remotis agentibus ac etiam in constitutis fuerant assecuti de facto possent ab aliquo molestari nobis humiliter supplicarunt ut si quis defectus esset quod non credebant qui per nos suppleri posset quatinus ex solita benevolencia suppleretur Nos igitur eorum supplicationibus annuentes defectus si quis fuerit supplemus ipsam appropriationem possessionis ingressum et inductionem in ea factam et quicquid subsecutum est ratificamus et gratificamus concedentes eisdem ut predictam ecclesiam cum omnibus iuribus et redditibus pertinentiis et appenditiis suis licite retinere in usus proprios possint ac canonice et pacifice possidere salva eiusdem ecclesie vicario tertia parte totius ecclesie et pertinentium ad eam quam nomine vicarie imperpetuum duximus assignandam reservato dictis priori et conventui manso cum libera terra circumiacente pro qua volumus quod de aliis bonis ecclesie prout iustum fuerit vicario competens et recompensatio et quod idem vicarius iura episcopalia et archidiaconalia persolvat et alia onera ordinaria supportet ad quam quidem vicariam nos et successores nostri futuris temporibus personam ydoneam nominabimus quotiens ipsam vacare contigerit Et predicti prior et conventus personam nominatam sine dilacione et contradictione qualibet nobis et successoribus nostris presentabunt instituendum in predicta vicaria In cuius rei perpetuam memoriam presens scriptum sigilli nostri munimine fecimus roborari Dat apud Harynge xiiii kal Junii anno domini millesimo CC septuagesimo septimo