Charter Document - 03410207

Universis presentem paginam visuris vel audituris Iohannes miseratione divina London episcopus salutem in domino sempiternam In hiis que honestati et ecclesie utilitati conveniunt postulancium desideriis est gratius annuendum Cum igitur dominus Herveus de Bortham nuper patronus medietatis ecclesie de Halstede nostre dioecesis et religiosi viri prior et conventus de Leghes alterius ipsius ecclesie medietatis nuper patroni totum ius patronatus quod in ecclesia de Halstede antedicta habuerunt decano et capitulo ecclesie nostre London liberaliter contulerint nos ecclesie nostre ac in eadem divinis officiis utilitati vacantibus prospicere et uberius providere volentes ad predictorum domini Hervei ac etiam prioris et conventus rogatum et specialem instanciam prefatam ecclesiam de Halstede decano et capitulo memoratis de consensu eorundem expresso in augmentum portionis minorum canonicorum et vicariorum in ecclesia nostra predicta ministrancium ita videlicet quod iidem canonici minores de proventibus ecclesie predicte octo libras et vicarii tres decem libras in augmentum sustentationis sue inter illos pro equalibus portionibus distribuendas per manus camerarii sancti Pauli annuatim percipiant in proprios usus integraliter conferimus et concedimus perpetuo convertendam salvis nobis et successoribus nostris lege dioecesana et iurisdictione in ecclesia de Halstede antedicta De sustentatione vero vicarii qui pro tempore fuerit in predicta ecclesia de Halstede cuius vicarie collatio cum vacaverit ad nos et successores nostros perpetuis temporibus pertinebit et vacante sede ad decanum et capitulum nostrum London quam etiam vicariam dilecto in Cristo filio Iohanni de Pentelow capellano contulimus taliter de expresso consensu et voluntate predictorum decani et capituli ordinamus videlicet quod predictus vicarius et successores sui nomine vicarie habeant et perpetuo iure percipiant unum mansum qui fuit quondam Roberti le Mayne rectoris unius medietatis ipsius ecclesie iuxta eandem sinuatum cum domibus edificiis viridariis gardinis et ceteris pertinentiis cum duabus acris terre arabilis que in ipso manso includuntur et una dimidia acra prati que iacet in Heythernesmede et una grava que vocatur Weylegheth item omnes oblationes decimas minores legata mortuariis ac alia singula ad alteragium predicte ecclesie qualitercumque pertinentia cum decimis omnium molendinorum et gardinorum parochie prelibate excepta decima feni omnium parochianorum dicte parochie et decima gardini quondam magistri Willelmi de Broksburn rectoris unius medietatis ecclesie antedicte cuius mansum ut includitur memoratis decano et capitulo assignamus exceptis etiam omnibus decimis minutis de eodem manso seu mesuagio provenientibus a quorum prestatione memorati decanus et capitulum perpetuo sint immunes Predicti vero vicarii omnia onera ipsius ecclesie ordinaria preter refectionem cancelli et dedicationem ipsius ecclesie sustinebunt et solvent singulis annis ad exequias obitus nostri cum acciderit in ecclesia nostra sancti Pauli London celebrandas quadraginta solidos et decano et capitulo ecclesie nostre predicte decem solidos annue pensionis Omnes vero ceteri fructus et proventus dicte ecclesie cum terris pratis mesuagiis gardinis pasturis et reditibus ad prefatos decanum et capitulum pleno iure pertineant salva in omnibus ecclesie nostre sancti Pauli London ut premittitur dignitate Ut autem hec presens nostra ordinacio perpetue robur optineat firmitatis presens instrumentum fieri fecimus tripartitum cuius una pars originalis penes nos et successores nostros altera pars penes predictos decanum et capitulum et tertia pars penes vicarium predictum et successores suos perpetuo remanebit Ordinamus insuper quod vicarius dicte ecclesie qui pro tempore fuerit unum sacerdotem ydoneum secum habeat continue commorantem per quem una cum ipso vicario et per alios sufficientes ministros eidem ecclesie honeste faciat de serviri Datum apud Stebnhee sexto idus Iunii anno domini MCC septuagesimo sexto