Charter Document - 03410202

Universis sancte matris ecclesie filiis ad quos presentes littere pervenerint Iohannes miseracione divina London episcopus salutem in Domino Ihesu Cristo Cum inclite recordationis Innocentius papa quartus ecclesiam de Stebbyng nostre dioecesis que est de patronatu religiosorum virorum prioris et fratrum hospitalis Iherosol in Anglia eisdem priori et fratribus salvo iure dioecesano in proprios usus concesserit applicandam ac venerabilis vir frater Iosep de Chauncy prior hospitalis predicti et fratres eiusdem nuper auctoritate predicti indulti apostolici ecclesiam de Stebbyng memoratam ingressi Rogerum de Boclaund presbiterum ad vicariam ecclesie predicte vacantem nobis presentaverint et instanter petierint de proventibus ecclesie predicte competentem porcionem ipsi vicario et successoribus suis nomine vicarie per nos assignari nos ad predictorum hospitalariorum instanciam officii nostri debitum diligencius exsequentes ad predicti Rogeri quem ad vicariam predictam ad presentacionem predicti fratris Iosephi domus hospitalis predicti prioris admisimus et perpetuum vicarium instituimus in eadem ac etiam ad successorum suorum sustentationem de voluntate et concessu expresso dictorum fratris Iosep prioris et fratrum hospitalis predicti assignamus porciones infra scriptas perpetuo iure nomine vicarie predicte possidendas videlicet mansum cum tofto et gardino que capellanus habere consuevit qui predicte ecclesie deservivit item tertiam partem totius decime garbarum provenientium de feudis de Colunciis et Ferariis quam quidem tertiam partem rectores ecclesie predicte hactenus percipere consueverunt cum tota decima feni eorundem feodorum item totam decimam unius carucate terre cum pertinentiis quam dominus Willelmus de Ferariis nuper emit de domino Nicholao de Stebbyng item omnes decimas minores parochie predicte oblaciones obvenciones legata mortuaria et omnia alia quocumque nomine censeantur pertinentia ad alteragium ecclesie memorate Et facient predictus vicarius et successores sui qui pro tempore fuerint ecclesie predicte per sufficientes et idoneos ministros de serviri ac etiam episcopalia archidiaconalia et omnia alia onera ipsius ecclesie ordinaria preter reparacionem cancelli et dedicacionem ecclesie supportabant necnon extraordinaria pro rata sue porcionis Totum vero residuum omnium proventuum terrarum et pratorum ecclesie predicte secundum tenorem apostolice littere salva ecclesie nostre London per omnia dignitate applicetur predictis priori et fratribus hospitalis predicti qui tamen onus reparationis cancelli et dedicationis ecclesie de Stebbyng predicte cum opus fuerit totaliter supportabant et etiam extraordinaria pro rata portionem suam contingente In premissorum vero testimonium presentes litteras fieri fecimus tripartitus quarum una tanquam originalis sigillo predictorum prioris et fratrum sigillata penes nos et successores nostros remanebit alia vero sigillo nostro signata penes hospitalarios predictos et tertia nostro et predictorum hospitalariorum sigillo signata penes vicarium predictum et successores suos ad perpetuam memoriam futurorum remanebit Dat London ii non Iulii anno gratie millesimo CCLXX sexto consecrationis nostre anno tercio