Charter Document - 03410167

Universis sancte matris ecclesie filiis ad quos presentes littere pervenerint Iohannes miseratione divina Lond episcopus saluutem in Domino Iesu Cristo Paternarum traditionum exemplis debitum pastoralis officii persolvere cupientes monasteria ancillarum Deo degentium sub nostro regimine que calcatis curis secularibus solius sponsi celestis cuius annulo subarantur inherent desiderio tam competenti et regulari moderamine intendimus auctore Deo disponere Ut ea que ad ipsarum sustentationem illis contulit pia fidelium devotio sine perturbatione possidentes quanto minus desudant in exteriorum laborioso certamine cum Martha tanto liberius totis desideriis vacare possint interiori contemplationis dulcedini cum Maria Cum igitur felicis recordationis Willelmus Lond episcopus predecessor noster honestam et laudabilem conversationem in Domino religiosarum mulierum priorisse et conventus de Clerkenwelle pietatis oculo considerans ecclesiam de Nortwelde in proprios usus eis contulerit et eedem moniales collationem huiusmodi postmodum a summis pontificibus ac episcopis predecessoribus nostris et a decano et capitulo London procuraverint confirmari salva competenti vicaria in eadem ecclesia ordinanda sicut in autenticis instrumentis vidimus plenius contineri nos in tam pio opere predecessorum nostrorum vestigiis inherentes concessionem et confirmationem predictis monialibus ipsis factas de predicta ecclesia quantum in nobis est concedimus et confirmamus meo tamen et ecclesie nostre Lond per omnia iure salvo Percipient autem predicte moniales et perpetuo iure possidebunt ratione appropriationis illam partem antiqui manerii ecclesie que vocatur Bernewyk cum grangiis aliis edificiis et gardinis prout distinguitur ab alia parte quodam muro terreo ducente a media porta usque ad stratam que est retro curiam item duas croftas terre arabilis propinquiores ecclesie prout fossatis et sepibus vallantur item duas partes decime garbarum cuiuscumque generis bladi ac etiam feni totius parochie Et si terras aliquas de bruera vel bosco contigerit assartari in parochia predicta percipient moniales duas partes decime bladi inde pervenientis Similiter si terra aliqua nemus vel pratum seu alia possessio legata vel alio modo collata fuerit indistincte prefate ecclesie moniales predicte duas inde partes optinebunt Super statu vicarie in ecclesia predicta taxande de voluntate et expresso consensu predictarum priorisse et conventus taliter ordinamus videlicet quod nos et successores nostri episcopi Lond vicariam ipsam quotiens vacaverit idonee persone conferemus iure nostro Et cum sedes Lond vacaverit decanus et capitulum conferant eandem vicariam si ipsam tunc contigerit vacare Iam enim ipsam vicariam vacantem contulimus Ricardo de Eli presbitero qui ratione vicarie sue percipiet et perpetuo iure possidebit et successores sui vicarii similiter illam partem mansi ecclesie cum aula cameris aliis edificiis et gardinis propinquiorem cimiterio prout ab alia parte distinguntur muro terreo supradicto item illam tertiam croftam que est remotior a domibus suis predictis prout sepibus recluditur item tertiam partem prati et pasture pertinentium ad ecclesiam item tertiam partem decime garbarum cuiuscunque generis bladi et feni totius parochie item tertiam partem decime assertorum si que fieri contigerit item tertiam partem terrarum nemorum pratorum vel aliarum possessionum si que contigerit indistincte legari vel alio modo conferri ecclesie predicte item omnes decimas minores oblationes obventiones et alia omnia undecumque pervenientia ratione ecclesie predicte Predictus vero vicarius et successores sui de portione sua solvent singulis annis monialibus predictis quatuor marcas sterlingorum ad quatuor terminos videlicet ad festum sancti Michaelis Nativitatem Domini Pascha et Nativitatem sancti Iohannis per equales portiones Si tamen vixerint ultra pascha si vero postquam fructus collegerint in autumno quacunque hora decesserint ante Pascha de tribus primis terminis solummodo satisfacere teneantur et futurus vicarius satisfaciet pro ultimo termino sequente Invenient etiam vicarii suis sumptibus libros calices vestimenta et alia ornamenta ecclesie et sustentabunt unam lampadem ardentem in ecclesia qui pro tribus croftis predictis solebat sustentari et per sufficientes et idoneos ministros facient eidem ecclesie deserviri Alia vero omnia et ordinaria et extraordinaria predicte moniales et vicarii sustinebunt pro rata suarum porcionum Ordinamus etiam quod moniales a prestatione decimarum de terris pratis et pasturis illam portionem contingentibus sint immunes et vicarii similiter de contingentibus portionem suam Et ut predictarum monialium indemnitati caveamus ne illarum laudanda simplicitas eis futuris temporibus sit dampnosa statuimus quod singuli quibus nos et successores nostri dictam vicariam conferemus antequam mittantur in ipsius collate sibi vicarie corporalem possessionem prestent monialibus predictis in capitulo suo apud Clerkenwelle iuramentum sicut fecit Ricardus suprascriptus quod predictas quatuor marcas annuas eis solvent terminis constitutis et quod nichil eorum que ad ipsas moniales pertinent per ordinationem predictam aliquatenus usurpabunt Ut autem premissa omnia perpetue firmitatis robur optineant presentes litteras quadripertitas in modum cirographi confectas quarum una pars penes nos alia penes moniales predictas tertia penes decanum et capitulum nostrum London et quarta penes vicarium et successores suos remanebunt fieri fecimus et nostri et predictarum priorisse et conventus sigillorum impressionibus communiri Hiis testibus domino Herveo de Borham decano Lond magistris Willelmo de Middleton officiali curie Cantuar et Radulpho de Ivingho officiali Lond Iohannes de Sancta Maria Radulpho de Baudak Robert de Dreiton canonicis Lond dominis Rogero de Westhorp et Iohanne de Waleton capellanis et aliis Dat apud Stebbenh non Iulii anno gratie MCC septuagesimo quinto et pontificatus nostri anno secundo